პოლიტიკა

ირაკლი კობახიძე ალექსანდრე ლუკაშენკოს შეხვდა - ბელორუსის პრეზიდენტი საქართველოს უახლოეს მომავალში ეწვევა

ბელორუსის რესპუბლიკაში ვიზიტის ფარგლებში საქართველოს პარლამენტის თავმჯდომარე ირაკლი კობახიძე ქვეყნის პრეზიდენტ ალექსანდრე ლუკაშენკოს შეხვდა.

კობახიძემ ალექსანდრე ლუკაშენკოს მადლობა გადაუხადა ბორჯომის ხეობაში ხანძრის სალიკვიდაციო სამუშაოების დროს ბელორუსის მხრიდან გაწეული დახმარებისთვის.

მხარეებმა ხაზგასმით აღნიშნეს, რომ ორ ქვეყანას ერთმანეთთან გამორჩეულად მეგობრული ურთიერთობა აკავშირებს. მათივე შეფასებით, ორმხრივი ურთიერთობა ბოლო წლებში განსაკუთრებით დინამიკური გახდა.

ბელორუსის პრეზიდენტმა პარლამენტის თავმჯდომარეს ვიზიტისთვის მადლობა გადაუხადა და განაცხადა, რომ მისი ქვეყანა დიდ მნიშვნელობას ანიჭებს საქართველოსთან აქტიურ საპარლამენტთაშორისო ურთიერთობას, რაც, მისივე თქმით, სხვადასხვა მიმართულებით თანამშრომლობისთვის კარგ საფუძველს შექმნის.

ირაკლი კობახიძის განცხადებით, საქართველოსთვის მნიშვნელოვანია ბელორუსის რესპუბლიკასთან ეკონომიკური და პოლიტიკური ურთიერთობის, ასევე, თანამშრომლობის საპარლამენტო განზომილების გაღრმავება.

შეხვედრაზე ქვეყნებს შორის თანამშრომლობის სხვადასხვა მიმართულებით გაღრმავების პერსპექტივები განიხილეს. ყურადღება სავაჭრო-ეკონომიკური ურთიერთობების გააქტიურებაზე გამახვილდა. ისაუბრეს მჭიდრო ხალხთაშორისი ურთიერთობის მნიშვნელობისა და სოფლის მეურნეობის სფეროში თანამშრომლობის შესახებაც.

საქართველოს პარლამენტის თავმჯდომარემ ალექსანდრ ლუკაშენკოს ბელორუსის რესპუბლიკის მხრიდან საქართველოს ტერიტორიული მთლიანობისა და სუვერენიტეტის ურყევი მხარდაჭერისთვის მადლობა გადაუხადა.

შეხვედრაზე აღინიშნა, რომ ბელორუსის რესპუბლიკის პრეზიდენტი საქართველოს უახლოეს მომავალში ეწვევა.