სამართალი

ირაკლი ფირცხალავამ დაასახელა კონკრეტული პირები, ვის საქმეშიც ირაკლი მამალაძე როგორც აგენტი მონაწილეობდა - ადვოკატი

ირაკლი ფირცხალავამ დაასახელა კონკრეტული სახელი და გვარები, ვის საქმეშიც ირაკლი მამალაძე მონაწილეობდა როგორც აგენტი, - განუცხადა ჟურნალისტებს ე.წ. ციანიდის საქმეში ბრალდებულ დეკანოზ გიორგი მამალაძის ერთ-ერთმა ადვოკატმა, მია ზოიძემ.

მისი თქმით, ყოფილი სამართალდამცველმა და ამჟამად მსჯავრდებულმა, ირაკლი ფირცხალავამ დეტალურად დაასახელა იმ პირების სახელები და გვარები, რომლებიც ირაკლი მამალაძის ჩართულობით დაიჭირეს.

ადვოკატის ინფორმაციით, ირაკლი ფირცხალავამ სასამართლოზე დაკითხვისას აღნიშნა, რომ ე. წ. ციანიდის საქმეში მთავარი მოწმე ირაკლი მამალაძე ერთ-ერთი ტელეკომპანიიდან სწორედ იმ მიზეზით გაათავისუფლეს, რომ ის ფარულად იწერდა საკუთარ თანამშრომლებს.

,,ვინაიდან ირაკლი ფირცხალავას დაკითხვა ამ წუთებში მიმდინარეობს, მე სახელებსა და გვარებზე ვერ ვისაუბრებ. თუმცა გეტყვით, რომ მოწმემ დაასახელა კონკრეტული პირები, ვის საქმეშიც ირაკლი მამალაძე როგორც აგენტი მონაწილეობდა. გეტყვით იმას, რომ ეს პირები ცნობილი არიან საზოგადოებისთვის. საუბარი იყო ასევე იმ ადამიანებზე, რომლებიც დაიჭირეს ირაკლი მამალაძის ჩართულობით. მოწმემ ისაუბრა ასევე, თუ როგორ გაათავისუფლეს ერთ-ერთი ტელევიზიიდან, რადგანაც ის ფარულად იწერდა საკუთარ თანამშრომლებს,” - განაცხადა ადვოკატმა მია ზოიძემ.

ნინო ექვთიმიშვილი