პოლიტიკა

იქმნება ძალიან არაორდინალური მდგომარეობა, რომელიც ხელს აძლევს ხელისუფლებას - „ევროპული საქართველო“ მარეგულირებელი კომისიის გადაწყვეტილების შეცვლას ითხოვს

„ევროპული საქართველოს“ ერთ-ერთმა ლიდერმა, ოთარ კახიძემ მოითხოვა, დაუყოვნებლივ შეიცვალოს კომუნიკაციების მარეგულირებელი კომისიის მიერ მიღებული გადაწყვეტილება, რომლის მიხედვით, საქართველოში მოქმედ მაუწყებლებს არასაარჩევნო პერიოდში პოლიტიკური პარტიების რეკლამის განთავსება აეკრძალათ.

კახიძის თქმით, პარტიის მოწოდებას მედიასაშუალებები, საარჩევნო ადმინისტრაცია და არჩევნების საკითხებზე მომუშავე არასამთავრობოები უერთდებიან.

მისივე თქმით, აღნიშნული გადაწყვეტილება მხოლოდ ხელისუფლებას აწყობს.

„კომუნიკაციების მარეგულირებელმა კომისიამ საქართველოში მოქმედ მაუწყებლებს აუკრძალა პოლიტიკური პარტიების რეკლამის განთავსება არასაარჩევნო პერიოდში. ეს ნიშნავს, რომ პოლიტიკური პარტიები მოკლებული არიან შესაძლებლობას, განათავსონ რეკლამა იმ საკითხებზე, რომელიც ეხება პარტიის პროგრამას, ეხება მათ საკანონმდებლო ინიციატივებს, ეხება სხვადასხვა საპროტესტო აქციასა თუ პარტიის ყრილობას. იქმნება ძალიან არაორდინალური მდგომარეობა, რომელიც ხელს აძლევს ხელისუფლებას, რომელიც შეუზღუდავად ათავსებს საკუთარ რეკლამებს და მათ სოციალური რეკლამის სტატუსი აქვთ. ამიტომ, „ევროპული საქართველო“ მიიჩნევს, რომ ეს აბსოლუტურად უსამართლო და არაკონსტიტუციური გადაწყვეტილება, რომელიც მიიღო მარეგულირებელმა კომისიამ და პირადად ბატონმა ბექაურმა, დაუყოვნებლივ უნდა გაუქმდეს და შეიცვალოს. ამისთვის „ევროპულმა საქართველომ“ მიმართა უწყებათაშორის საბჭოს, რომ გაიცეს შესაბამისი რეკომენდაცია.

მინდა, საზოგადოებას ვუთხრა, რომ ჩვენს პოზიციას იზიარებს პრაქტიკულად ყველა მედიასაშუალება, საარჩევნო ადმინისტრაცია, ყველა ის არასამთავრობო ორგანიზაცია, რომლებიც მუშაობენ არჩევნების საკითხებზე. ეს მდგომარეობა ართმევს საშუალებას მედიაორგანიზაციებს, რომ მიიღონ შემოსავალი, განახორციელონ შეუფერხებლად სამეწარმეო საქმიანობა და ამავე დროს ართმევს საშუალებას პოლიტიკურ პარტიებს, რომ თავიანთი გზავნილები მიაწოდონ მასმედიის საშუალებით მოქალაქეებსა და მოსახლეობას. რა თქმა უნდა, ესაა აბსოლუტურად მიუღებელი გადაწყვეტილება, რომელიც მიიღო მარეგულირებელმა კომისიამ და ეს გადაწყვეტილება დაუყოვნებლივ, რაც შეეძლება სწრაფად უნდა შეიცვალოს და აღდგეს სამართლიანი საარჩევნო გარემო ამ საკითხთან მიმართებით“, - განაცხადა კახიძემ.