პოლიტიკა

ინოვაციებისა და ტექნოლოგიების სააგენტოს გიორგი ზვიადაძე უხელმძღვანელებს

საქართველოს ეკონომიკისა და მდგრადი განვითარების მინისტრმა გიორგი გახარიამ ინოვაციებისა და ტექნოლოგიების სააგენტოს თანამშრომლებს ახალი ხელმძღვანელი წარუდგინა.

ეკონომიკის სამინისტროს ინფორმაციით, გიორგი ზვიადაძე სააგენტოს ხელმძღვანელის თანამდებობაზე ეკონომიკის სამინისტროს მიერ გამოცხადებული კონკურსის შედეგად შეირჩა და მოვალეობის შესრულებას 21 ივნისიდან შეუდგება.

„სახელმწიფო ძალიან დიდ რესურსს ხარჯავს ჩვენს ქვეყანაში ინოვაციური განვითარების მიმართულებით, შესაბამისად, გვჭირდება უფრო ეფექტური და თვალსაჩინო შედეგები. ეს არის ძირითადი მიზანი და ამოცანა, რომელიც დღეს სააგენტოს წინაშე დგას. ვიმედოვნებ, რომ ახალ ხელმძღვანელთან ერთად აქტიური მუშაობის შედეგად ბევრი სიახლე გექნებათ. ამოცანები, რომელსაც თქვენ ასრულებთ, არის საინტერესო, ახალი, გამომწვევი და იმედი გვაქვს, რომ გაორმაგებული ენერგიით და შედეგებით გააგრძელებთ თქვენს საქმიანობას“ - განუცხადა სააგენტოს თანამშრომლებს გიორგი გახარიამ.

მინისტრის თქმით, ძალიან მნიშვნელოვანია ინოვაციური ცოდნის მიტანა თითოეულ მოქალაქესთან და იდეების კონკრეტულ ბიზნესპროდუქტებად კონვერტირება, რა მიმართულებითაც ინოვაციებისა და ტექნოლოგიების სააგენტოს ახალ ხელმძღვანელს საკმაოდ დიდი გამოცდილება აქვს „მინდა, რომ რაც შეიძლება მალე წარმოადგინოთ კონკრეტული გეგმები, სად მივდივართ, რა გვაქვს უახლოესი ნაბიჯები და ვიმსჯელოთ იმ პროექტებზე, რომლებსაც წარმატებით განახორციელებთ“ - აღნიშნა ეკონომიკისა და მდგრადი განვითარების მინისტრმა.

გიორგი ზვიადაძეს დამთავრებული აქვს ივ. ჯავახიშვილის სახელობის თბილისის სახელმწიფო უნივერსიტეტის ჰუმანიტარულ მეცნიერებათა ფაკულტეტი, ასევე კავკასიის უნივერსიტეტის სისხლის სამართლის მაგისტრატურა, ლიტვის Mykolas Romeris და ბრიტანეთის Middlesex უნივერსიტეტის სამაგისტრო პროგრამები. 2016-2017 წლებში ზვიადაძე ვილნიუსში კომპანია Langua Paslauga-ს საინფორმაციო ტექნოლოგიების მიმართულების მენეჯერი იყო, 2012-2017 წლებში საქართველოს მცირე და საშუალო საწარმოთა ასოციაციის სამეთვალყურეო საბჭოს თავმჯდომარის პოსტს იკავებდა.

2009 წელს დააფუძნა და 2017 წლამდე ხელმძღვანელობდა კომპანია ”გლობალ სელის,” 2004-2006 წლებში კომპანია ”ჯეოსელში” ინოვაციების და ახალი პროდუქტების კონტრაქტორი-მენეჯერი იყო. არის არაერთი კომპანიის დამფუძნებელი საქართველოსა და მის ფარგლებს გარეთ. გიორგი ზვიადაძეს სხვადასხვა პოზიციებზე მუშაობის 13 წლიანი გამოცდილება აქვს.

„გასული ორი წლის მანძილზე ლიტვაში ვმუშაობდი კვლევაზე პოსტსაბჭოთა სივრცის ქვეყნებში ინოვაციური ეკოსისტემის პლატფორმის შექმნის, მოდელირების და მართვის შესახებ და მგონია, რომ იმის რეალიზება, რაზეც ვიმუშავე ორი წელიწადი, საქართველოში ყველაზე უკეთ ტექნოპარკში შეიძლება. მიმაჩნია, რომ საქართველოს პრემიერ-მინისტრის ინიციატივით შექმნილი ეს ძალიან მაგარი ორგანიზაცია იმსახურებს იმას, რომ მთელი გულით და სულით ვემსახურო მის განვითარებას. მზად ვარ იმისთვის, რომ მთელი ჩემი უნარები, დრო, ენერგია, გამოცდილება მოვახმარო და ის ვაკეთო ჩემი ქვეყნისთვის, რაც ყველაზე უკეთ მესმის“ - განაცხადა გიორგი ზვიადაძემ სააგენტოს თანამშრომლებთან შეხვედრისას.

მისი შეფასებით, ქართველების გონებრივი შესაძლებლობები არის ძალიან ძლიერი, ბევრი იდეა არსებობს და ამ იდეების გადაქცევა ბიზნესპროექტებად არის ერთ-ერთი მთავარი გამოწვევა. „ასეთმა პროექტებმა სარგებლობა უნდა მოუტანოს არამხოლოდ ტექნოპარკს, არამედ ზოგადად საქართველოს, სადაც იქნება მომგებიანი კლიმატი ამ კუთხით ინვესტირებისთვის. ქართული ინოვაციები არის ბრენდი ბევრი სხვა ქვეყნისთვის და გვინდა, რომ ამ მიმართულებით ძალიან აქტიურად ვიმუშავოთ“ - აღნიშნა გიორგი ზვიადაძემ.