საზოგადოება

ინფიცირებული პაციენტებიდან 4-ის მდგომარეობა მძიმეა, სამის კი - კრიტიკული - ლევან რატიანი

პირველ საუნივერსიტეტო კლინიკაში ამ დროისთვის 81 პაციენტია მოთავსებული, საიდანაც 66-ს კორონავირუსი დადასტურებული აქვს, - ამის შესახებ კლინიკის დირექტორმა, ლევან რატიანმა განაცხადა.

როგორც მან აღნიშნა, ინფიცირებული პაციენტებიდან 4-ის მდგომარეობა მძიმეა, სამის კი - კრიტიკული.

„ამ ეტაპზე კლინიკაში არის 81 პაციენტი, აქედან 66 არის კოვიდ ინფიცირებული დადასტურებული შემთხვევა. დანარჩენ პაციენტებთან დაკავშირებით ველოდებით ლუგარის ლაბორატორიიდან შედეგებს და თუ დადასტურდება უარყოფითი შემთხვევები პაციენტები გაეწერებიან პროტოკოლის დაცვით. რეანიმაციაში ამ ეტაპზე გვყავს 9 პაციენტი. მათი მდგომარეობა მეტნაკლებად სტაბილურია. სამი პაციენტის მდგომარეობა არის კრიტიკული. რაც შეეხება დანარჩენი პაციენტების მდგომარეობას, იმყოფებიან სიპაბვენტილაციაზე“, - განაცხადა რატიანმა.

გარდა ამისა, რატიანის ინფორმაციით, რამდენიმე პაციენტის მდგომარეობა მკვეთრად გაუმჯობესდა. ერთ-ერთი კლინიკას დღეს დატოვებს.

„ასევე ქალბატონი, რომელიც 80 წლისაა, დღეს გადმოვა თერაპიულ განყოფილებაში და ალბათ ხვალ დატოვებს კლინიკას კოვიდ ვირუსის გარეშე. ორჯერადი ტესტირების შემდეგ ამ ქალბატონთან არ დადასტურდა კოვიდ ინფექცია. ასევე იცით, რომ გვყავდა მძიმე პაციენტი 42 წლის ბატონი, რომელსაც მოეხსნა სუნთქვის უკმარისობა, აღდგენილია ფილტვის ქსოვილის სტრუქტურა კომპიუტერული ტომოგრაფიით და ეს პაციენტიც გადავიდა თერაპიულ განყოფილებაში. რაც შეეხება რეანიმაციიდან კიდევ ერთი პაციენტის გადაყვანას ვაპირებთ, რომლის მდგომარეობაც მკვეთრად გაუმჯობესებულია“, - განაცხადა რატიანმა.

მან ასევე ორსული პაციენტების და არასრულწლოვნების შესახებ ისაუბრა.

„მინდა გითხრათ, რომ გუშინ ჩვენგან 24 კვირის ორსული ქალბატონი გაეწერა. მეორე, 9 კვირის ორსულის ჯანმრთელობის მდგომარეობა სტაბილურია. პაციენტი 14 დღის გავლას ელოდება, რომ პროტოკოლის მიხედვით, ტესტირება ჩაუტარდეს. ასევე, იცით, რომ კლინიკაში გვყავს სამი მოზარდი და მათი ჯანმრთელობის მდგომარეობა ამ ეტაპზე სტაბილურია“,- აღნიშნა რატიანმა.