სამართალი

ინფექციური საავადმყოფოს ფანჯრებს რამდენიმე ტყვია ესროლეს

პირის ვინაობა, რომელმაც ინფექციური საავადმყოფოს ფანჯრებს იარაღიდან ესროლა, სავარაუდოდ, დადგენილია.

როგორც კლინიკაში მყოფმა ერთ-ერთმა პაციენტმა საზოგადოებრივ მაუწყებელთან საუბარში განაცხადა, ადგილზე სამართალდამცველები დილამდე მუშაობდნენ და სპეციალური მოწყობილობის მეშვეობით, იმის დადგენა შეძლეს, საიდან მოხდა გასროლა.

მისივე ინფორმაციით, გასროლა განხორციელდა საავადმყოფოსთან მდებარე კორპუსიდან და სავარაუდო დამნაშავე ნასვამ მდგომარეობაში იმყოფებოდა.

„ჯერ გავიგე 4 გასროლის ხმა, ცოტა ხანში, პალატაში ფანჯრის შუშა გასკდა და უკვე მეორეჯერ რომ გასკდა შუშა, პალატაში მყოფები იატაკზე დავწექით. მე დავრეკე 112-ში და ხოხვით გავედი კორიდორში“, - განაცხადა ფაქტის თვითმხილველმ.

შემთხვევა გვიან ღამით მოხდა. შინაგან საქმეთა სამინისტროში ჯერჯერობით არ ამბობენ, დადგენილი და დაკავებულია თუ არა ინციდენტში მონაწილე პირი.

მომხდართან დაკავშირებით გამოძიება 187-ე მუხლით მიმდინარეობს რაც ნივთის განზრახ დაზიანებას ან განადგურებას გულისხმობს.