პოლიტიკა

იმედს ვიტოვებთ, რომ ნებისმიერი სამართლებრივი მოქმედებები, რაც უნდა აღსრულდეს, იქნება სამართლიანი - როს იულსონი მერაბიშვილის საქმეზე

აშშ-ის ელჩის მოვალეობის შემსრულებელი, როს იულსონი ევროპის საბჭოს კომიტეტის მიერ ყოფილი შს მინისტრის, ვანო მერაბიშვილის განაჩენების ეჭვქვეშ დაყენებას გამოეხმაურა. კომიტეტში არ გამორიცხეს, რომ არსებობდეს კავშირი ამ განაჩენებსა და იმ ზეწოლას შორის, რომელსაც ადგილი ჰქონდა მერაბიშვილის საკნიდან გაყვანის დროს.

იულსონმა აღნიშნა, რომ ვანო მერაბიშვილის საქმესთან დაკავშირებით საგამოძიებო მოქმედებები სამართლის ფარგლებში წარიმართება.

„კონკრეტულად ევროპის საბჭოს კომიტეტის განცხადებაზე ვერ გავაკეთებ კომენტარს, თუმცა აშშ-სთვის კანონის უზენაესობა არის მნიშვნელოვანი. შესაბამისად, ნებისმიერი საკითხი, რაც ამას შეეხება, არის მნიშვნელოვანი. იმედს ვიტოვებთ, რომ ნებისმიერი სამართლებრივი მოქმედებები, რაც უნდა აღსრულდეს, იქნება სამართლიანი“, - განაცხადა იულსონმა.

ევროსაბჭოს კომიტეტმა მოუწოდა საქართველოს ხელისუფლებას, რომ მან რაც შეიძლება დროულად გამოიძიოს ყოფილი პრემიერის ციხიდან გაყვანის ფაქტი, გამოავლინოს პასუხისმგებელი პირები და დაიწყოს მათზე სისხლის სამართლებრივი დევნა.