პოლიტიკა

იმედს ვიტოვებთ არცერთი ოპოზიციური პარტია არ წამოეგება ამ სატყუარას - ზურაბ ჭიაბერაშვილი უბარიერო არჩევნებზე

„ევროპული საქართველოს“ წევრის, ზურაბ ჭიაბერაშვილის განცხადებით, 2020 წლის საპარლამენტო არჩევნების საარჩევნო ბარიერის გარეშე ჩატარება ერთგვარი სატყუარაა და იმედს იტოვებს, რომ არცერთი პოლიტიკური პარტია ამას არ წამოეგება.

ჭიაბერაშვილის თქმით, მმართველ გუნდს ყურადღების გადატანა სურს საარჩევნო სისტემის პროპორციულ მოდელზე გადასვლის საკითხიდან უბარიერო არჩევნებზე.

„ „ქართული ოცნება“ ჯიუტად ამბობს უარს იმაზე, რასაც ითხოვს მთელი ქართული საზოგადოება და ჩვენ, „ევროპული საქართველო“. ესაა საარჩევნო სისტემის 2020 წლიდან პროპორციულ სისტემაზე გადასვლა. სანაცვლოდ „ქართული ოცნება“ აგრძელებს საზოგადოებისთვის თვალში ნაცრის შეყრასა და სატყუარის შეთავაზებას, როგორიცაა მათი ბოლო შეთავაზება.

ჩვენ, „ევროპული საქართველო“, იმედს ვიტოვებთ, რომ არცერთი ოპოზიციური პარტია არ წამოეგება ამ სატყუარას“, - განაცხადა ჭიაბერაშვილმა.

შეგახსენებთ, გუშინ ქართულ მედიაში გავრცელებული ინფორმაციით, მმართველი პარტია ოპოზიციასთან შეთანხმების შემთხვევაში 2020 წლის საპარლამენტო არჩევნებზე გამონაკლისის სახით საარჩევნო ბარიერს მოხსნის.

როგორც შემდგომ საპარლამენტო უმრავლესობის წევრმა გია ვოლსკიმ განაცხადა, ამაზე საუბარი მმართველ გუნდში არ ყოფილა, თუმცა „ქართული ოცნება“ მზადაა, ოპოზიციას შეხვდეს და განიხილოს როგორც საარჩევნო ბარიერი, ასევე სხვა საკითხები.