სამართალი

იმედის ვიტოვებ, რომ მომდევნო სასამართლო პროცესზე მამა გიორგი კვლავ არ მომიწოდებს პროცესის დატოვებისკენ - გიორგი ფანცულაია

ე.წ ციანიდის საქმეზე ბრალდებულის დეკანოზ გიორგი მამალაძის ადვოკატები განმარტავენ, თუ რატომ დატოვეს, დეკანოზის მსგავსად, დღევანდელი სასამართლო პროცესი.

როგორც მედიას ადვოკატმა გიორგი ფანცულაიამ განუცხადა, მას ვალდებულება აქვს არ წავიდეს მისი დაცვის ქვეშ მყოფის ინტერესების საწინააღმდეგოდ.

„მე რომ წავიდე მის წინააღმდეგ, იმოქმედებს ეთიკის კომისია, რომელიც მეტყვის რომ ჩემი დასაცავის ნების წინააღმდეგ რატომ წავედი. ამიტომ, მე დავტოვე სასამართლო სხდომა. მამა გიორგი მამალაძეს დაველაპარაკები და იმედის ვიტოვებ, რომ მომდევნო სასამართლო პროცესზე არ მომიწოდებს იმავესკენ“,-აღნიშნა ფანცულაიამ.

ადვოკატმა გიორგი რამიშვილმა კი აღნიშნა, რომ თავად დეკანოზმა პროცესი პროტესტის ნიშნად დატოვა. რამიშვილის თქმით, გიორგი მამალაძეს უფლებები აქვს შელახული.

„პროტესტის ნიშნად, იმიტომ, რომ თავისი უფლებები შელახული აქვს, როგორც ბრალდებულს არანაირი უფლება არ დაუტოვეს. მამა გიორგიმ დატოვა სასამართლო სხდომა და ჩვენ, ადვოკატებს ოფიციალურად, კატეგორიულად მოგვთხოვა, რომ აღნიშნული სასამართლო სხდომა დაგვეტოვებინა“,-განაცხადა გიორგი რამიშვილმა.

მონიკა დავლიანიძე