პოლიტიკა

იმედიანად ვართ განწყობილი, რომ მომდევნო კვირაში ერგნეთის შეხვედრა გვექნება - ევროკავშირის სადამკვირვებლო მისიის ხელმძღვანელი

ევროკავშირის სადამკვირვებლო მისიის ხელმძღვანელის, ერიკ ჰოგმას ინფორმაციით, ჟენევის მოლაპარაკებების დასრულების შემდეგ ერგნეთის ჩაშლილი შეხვედრების განახლებაზე დე ფაქტო ცხინვალის წარმომადგენლობამ თანხმობა განაცხადა.

ერიმკ ჰოგმა იმედი გამოთქვა, რომ შეხვედრებზე ყველა ჩართული მხარე სრულად იქნება წარმოდგენილი.

„ინციდენტების მართვისა და მათზე რეაგირების ფორმატის შეხვედრები, ადგილზე არსებული ვითარების განსახილველად ყველაზე მნიშვნელოვანი ფორმატია. ჩვენ დიდი ხნის განმავლობაში ვიმუშავეთ ერთად ამ ფორმატის თანათავმჯდომარე ეუთო-სთან ერთად, რომ კვლავ გაგვეახლებინა შეხვედრები.

ახლა კი ჩანს, რომ შეთანხმება შედგა და შეხვედრები განახლდება მომდევნო კვირას, ეს კი უმნიშვნელოვანესია, რადგან რამდენიმე თვის მანძილზე ხანგრძლივი ჩავარდნა გვქონდა. IPRM-ისასიცოცხლოდ მნიშვნელოვან ფორმატად რჩება, რადგან ეს ის ადგილია, სადაც ვმსჯელობთ, როგორ აღმოვფხვრათ ინციდენტები, როგორ გავუმკლავდეთ უსაფრთხოების გამოწვევებს ადგილზე, იმ ადამიანების საკეთილდღეოდ, ვინც ადმინისტრაციულ სასაზღვრო ხაზის მიმდებარედ ცხოვრობენ.
ამიტომ, იმედიანად ვართ განწყობილი, რომ შეხვედრა გვექნება უკვე მომდევნო კვირაში, ვიმედოვნებთ რომ მასში ყველა მონაწილე იქნება ჩართული ოკუპირებული ცხინვალის მხრიდან“, - განუცხადა ჰოგმა ,,პირველი არხს“.

ამასთან, ჟენევის დისკუსიების დასრულების შემდეგ რუსეთის საგარეო საქმეთა მინისტრის მოადგილე, გრიგორი კარასინმა განაცხადა, რომ ოთხოზორია-ტატუნაშვილის საქმესთან დაკავშირებით თბილისის შეურიგებელი პოზიციის გამო, ინციდენტების პრევენციისა და მათზე რეაგირების მექანიზმის შეხვედრა უმოქმედოა.