პოლიტიკა

იმედია, ვარდების რევოლუცია ისტორიას აუცილებლად შემორჩება, რადგან ის თავისი წარმატებებითა და შეცდომებით, ისტორიის ერთ-ერთი მნიშვნელოვანი ეტაპი იყო - მარიამ ჯაში

განათლების საპარლამენტო კომიტეტის თავმჯდომარე, მარიამ ჯაში გამოეხმაურა „ვარდების მოედნისთვის“ სახელის შესაძლო გადარქმევის საკითხს. დეპუტატმა აღნიშნა, რომ არ უნდა იყოს დავიწყებული ქვეყნის უახლესი ისტორია.

„ნებისმიერი სახელდების პროცესში ჩემი, როგორც ერთი დეპუტატის პოზიცია გახლავთ ის, რომ ჩვენ ჩვენს ისტორიებს პატივი აუცილებლად უნდა ვცეთ. თუმცა წონადობა იმ ისტორიული მოვლენების ბუნებრივია, განხილვის საკითხი შეიძლება იყოს. პირველი რესპუბლიკა საქართველოსთვის ბოლო საუკუნის მანძილზე უაღრესად ისტორიული მოვლენა იყო, შესაბამისად, ისტორიული წონადობა საქართველოსთვის პირველ რესპუბლიკას ბევრად უფრო მასშტაბური აქვს. მე ყოველთვის წინააღმდეგი ვარ, როდესაც ჩვენი ისტორიის სხვადასხვა ფაზების მიმართ დამოკიდებულებები იცვლება“, - თქვა ჯაშმა.

ჯაშის აზრით, ვარდების რევოლუცია საქართველოს ისტორიას შემორჩება, რადგან შეცდომების მიუხედავად, ქვეყნისთვის ერთ-ერთი მნიშვნელოვანი ეტაპი იყო.

„იმედი მაქვს, რომ ვარდების რევოლუციის სახელიც ჩვენს ისტორიას აუცილებლად შემორჩება, რადგან ეს ჩვენი გარდამავალი ქვეყნის სახელმწიფოებრივი მშენებლობისთვის თავისი წარმატებებითა და შეცდომებით, ერთ-ერთი მნიშვნელოვანი ეტაპი იყო. ამ ყველაფრის გათვალისწინებით, ჩვენ ჩვენს უახლეს ისტორიას არ უნდა ვივიწყებდეთ“, – განაცხადა დეპუტატმა.