პოლიტიკა

იმდენად დამფრთხალი და შეშინებულია ცენტრალური გამყალბებელთა კომისია, რომ გადაწყვიტეს შენობის ბორდერიზაცია - გიორგი გუგავა

,,ლეიბორისტული პარტია“ ცესკოს არჩევნების გაყალბების მცდელობაში ადანაშაულებს.

პარტიის მერობის კანდიდატმა, გიორგი გუგავამ მხარდამჭერებთან ერთად კომისიის შენობასთან აქცია გამართა.

მისი განცხადებით, საარჩევნო კომისიის ხელმძღვანელებმა წინასწარ იციან, რომ გაყალბების შემდეგ საპროტესტო გამოსვლები ელოდებათ და უსაფრთხოების ზომებს დღესვე იღებენ.

გუგავამ შენობასთან განგალაგებულ უსაფრთხოების ჯებირებზე მიუთითა.

,,იმდენად დამფრთხალი და შეშინებულია ცენტრალური გამყალბებელთა კომისია, რომ გადაწყვიტეს შენობის ბორდერიზაცია და ლამის მავთულხლართებით შემოღობვა. ბუნებრივია, აღშფოთებულ ხალხს ეს ვერ შეაჩერებს. თუ გაბედეს, ღმერთი გაუწყრათ და გადაწყვიტეს არჩევნების ტოტალური გაყალბება, მათ მოუწევთ აუცილებლად გამობრძანება ამ კაბინეტებიდან და სხვა შემოღობილში ყოფნა, ოღონდ ეს სხვა უბანშია და ჰქვია გლდანის იზოლატორი“, - განაცხადა გუგავამ აქციაზე.

თავის მხრივ, ცესკო-ში განმარტავენ, რომ შემოსაღობად გაკეთებული კონსტრუქციები პარკინგის ზოლის გამოყოფას ისახავს მიზნად.

,,ავტოსადგომის მოწყობა მხოლოდ და მხოლოდ უკავშირდება კომფორტის შექმნას ცესკო-ში სტუმრობის შემთხვევაში.

შლაგბაუმის გაკეთება არ იგეგმება და არსებული ავტოსადგომის შემოღობვა არანაირად ხელს არ უშლის ცესკო-ში ჩართული მხარის წარმომადგენელთა მოსვლას. აბსოლუტურად ღიაა, მისადგომად ადვილი და ხელსაყრელი“, - განმარტავენ ცესკო-შო.

ნინო ექვთიმიშვილი