პოლიტიკა

იყოს პრეზიდენტის სინდისზე ციანიდის საქმე და მამაოს მდგომარეობა - მეუფე პეტრე

ჭყონდიდის მიტროპოლიტის, მეუფე პეტრე ცაავას განცხადებით, ე.წ. ციანიდის საქმეზე წმ. სინოდმა დაუყოვნებლივ უნდა შექმნას კომისია, რომელიც ამ საქმეზე საზოგადოებას პასუხს გასცემს. მან ასევე მოუწოდა პარლამენტის დროებითი საგამოძიებო კომისიის წევრებს, გამოითხოვონ ეს საქმე და ჩაერთონ მის გამოძიებაში.

მეუფემ აღნიშნა, რომ დეკანოზის საპატიმროში ყოფნაზე პასუხისმგებლობა პრეზიდენტს ეკისრება.

„მათ მოინდომეს, პილატეს მსგავსად ხელები დაებანათ და თავი აარიდეს პასუხისმგებლობას. მაგრამ როგორც პილატეს არ მიეტევა ქრისტეს სასამართლოსაგან თავის არიდება და ის უმკაცრესად დაისაჯა, ასევე უმკაცრესად მოეთხოვებათ პასუხი ადამიანებს, რომლებმაც მიიღეს ეს გადაწყვეტილება და ამ შემთხვევაში ცხადად გამოჩნდა, რომ უზენაესი სასამართლო არის არსებული, სამწუხაროდ, დამნაშავე სისტემის შემადგენელი ნაწილი და არა მსხვერპლი. წმ. სინოდმა უკვე დაუყოვნებლივ იმოქმედოს მიღებული გადაწყვეტილებისა და განჩინების შესაბამისად და შექმნას კომისია, რომელიც ქართველ ერს საბოლოოდ ეტყვის სიმართლეს. პარალელურად წმ. სინოდის კომისიისა პარლამენტში უკვე არსებული კომისია, რომელიც მოქმედებს და მუშაობს ეფექტურად, გამოითხოვოს ე.წ. ციანიდის საქმე და ჩაერთოს დიდსულოვნად ამ პროცესში.

იყოს პრეზიდენტის სინდისზე ციანიდის საქმე და მამაოს მდგომარეობა“,-განაცხადა მეუფე პეტრემ.

ცნობისთვის, ადვოკატების საკასაციო საჩივარი ე.წ. ციანიდის საქმეზე, უზენაესმა სასამართლომ წარმოებაში არ მიიღო.