სამართალი

იყო მუქარაც ჩემი შვილების მომავალზე - ირაკლი გედენიძე

ე.წ. ფოტოგრაფების საქმეში ერთ-ერთი ყოფილი ბრალდებული, ფოტორეპორტიორი ირაკლი გედენიძე 2011 წლის მოვლენებს იხსენებს, რა დროსაც ის და მისი მეუღლე სხვა ფოტორეპორტიორებთან ერთად ჯაშუშობის ბრალდებით დააკავეს.

ირაკლი გედენიძე მასზე განხორციელებულ ფსიქოლოგიურ ზეწოლასა და მუქარის ფაქტებზე მიუთითებს, რომლითაც მას იძულებით აღიარებითი ჩვენება მიაცემინეს.

,,მოდელები იყო გადაღებული ,,ნიუ’’ ჟანრის სტილში და ასევე, ჩემი მეუღლე იყო გადაღებული ამ ჟანრის სტილში, ოღონდ პირადი მოხმარებისთვის და შენახული იყო ჩემს პირად არქივში. ეს ფოტო იპოვეს, ამოიღეს და დაიწყეს შანტაჟი, რომ ეს გავრცელდებოდა სოციალურ მედიაში. ამან იმოქმედა, რა თქმა უნდა, ჩემს მეუღლეზე, ჩემზედაც და მიიღეს სასურველი შედეგი. ეს იყო ერთ-ერთი მთავარი მიზეზი. თუმცა ფოტო ერთადერთი მიზეზი არ ყოფილა. იქ იყო მუქარაც კონკრეტულად ჩემი შვილების მომავალზე. კერძოდ, მათ დამისახელეს, რომელ სკოლაში სწავლობდნენ და დავფიქრებულიყავი მათ მომავალზე, რომ რამე პრობლემა არ შექმნოდათ’’, - განუცხადა ჟურნალისტებს ირაკლი გედენიძემ.

2011 წელის ივლისში ჯაშუშობის ბრალდებით დაკავებული კიდევ ერთი ფოტორეპორტიორი, გიორგი აბდალაძე ვანო მერაბიშვილისა და შოთა უტიაშვილის ბრალეულობაზე ამახვილების ყურადღებას.

,,თავისთავად ცხადია, დამკვეთები მე ვფიქრობ, რომ იყვნენ მაშინდელი შს მინისტრი, მისი მოადგილე ერთ-ერთი, უტიაშვილს ვგულისხმობ. ყველა ის ადამიანი, ვინც ფიგურირებდა ჩვენს საქმეში, ვინც საპყრობილეში იყვნენ, რა თქმა უნდა, შემსრულებლები იყვნენ. ძალადობის ფაქტები, რაც ხდებოდა ჩვენ თავს, ეს დავალება იყო და დავალებას ასრულებდნენ ის ადამიანები. ჩემთვის, როგორც ერთ-ერთი დაზარალებულისთვის, ყველაზე მთავარი არის, რომ ამ საქმის დამკვეთებმა აგონ პასუხი. საქმის კურსში იყო მიხეილ სააკაშვილი. მის გარეშე ამ ქვეყანაში არცერთი უკანონო ბრძანება არ გაიცემოდა’’, - განუცხადა ჟურნალისტებს გიორგი აბდალაძემ.

შეგახსენებთ, რომ საქართველოს მთავარმა პროკურატურამ ე.წ. ფოტორეპორტიორების საქმეზე ორი პირის მიმართ სისხლისსამართლებრივი დევნა დაიწყო. პროკურატურის სამართალწარმოების პროცესში ჩადენილი დანაშაულის გამოძიების დეპარტამენტის მიერ ე.წ. ,,ფოტორეპორტიორების საქმეზე“, ძალადობით და დაზარალებულის პირადი ღირსების შეურაცხყოფით განხორციელებული სამსახურებრივი მდგომარეობის გადამეტების ფაქტზე დაკავებულ იქნა საქართველოს შსს კონტრდაზვერვის დეპარტამენტის ქ.თბილისის ტერიტორიული სამმართველოს უფროსის ყოფილი მოადგილე დავით დევნოზაშვილი, ხოლო სასჯელაღსრულების დაწესებულების N8 საპყრობილის ყოფილი დირექტორის ალექსანდრე მუხაძის მიმართ გამოტანილ იქნა დადგენილება მისი ბრალდების შესახებ.

ნინო ექვთიმიშვილი