პოლიტიკა

„იბერია ტვ“-სა და „ომეგა ჯგუფის“ გარშემო შექმნილი საყოველთაო განწყობის ფონზე, სამწუხაროდ, ვერსად ვერ გავიგონე „პატრიოტთა ალიანსის“ ხმა - ნატო ჩხეიძემ „პატრიოტთა ალიანსი” დატოვა

ტელეკომპანია „იბერიას“ დამფუძნებელმა ნატო ჩხეიძემ ოფიციალურად დატოვა „პატრიოტთა ალიანსი“. მისი თქმით, ტელეკომპანია „იბერიასა“ და „ომეგა ჯგუფის“ გარშემო მიმდინარე მოვლენების დროს მან ვერ იგრძნო მხარდაჭერა „პატრიოტთა ალიანსისგან“, რის გამოც გადაწყვიტა პარტიიდან გასვლა.

როგორც მან პარლამენტის პლენარულ სხდომაზე განაცხადა, ის საპარლამენტო საქმიანობას დამოუკიდებელი დეპუტატის სტატუსით გააგრძელებს.

„ამ ორ კვირაში სესიიდან სესიამდე საკმარისზე მეტი მავნე და ქვეყნისთვის საზიანო გადაწყვეტილებების მიღება მოასწრო ხელისუფლებამ, ქვეყნის ეკონომიკის პრიორიტეტად ნარკოპლანტაციები რომ დასახა და მარიხუანა მწვანე ოქროდ წარმოგვიდგინა. ეს იყო ანტისახელმწიფოებრივი და ანტიმორალური გადაწყვეტილება, რასაც ქართულმა ეკლესიამ დროულად შეუშალა ხელი , მაგრამ, ჩანს, ჯერ ვერ აღკვეთა.

ამავე ორ კვირაში გახმიანდა კიდევ ერთი ანტისახელმწიფოებრივი და მეტად მტკივნეული მოვლენა - სამთავრობო შეტევა მედიასა და ბიზნესზე. განსაცდელშია ტელეკომპანია „იბერია“, განსაცდელშია „ომეგა ჯგუფში“ დასაქმებული 1500-მდე ადამიანი, დახურულია საწარმო. ამ მოვლენამ გამოიწვია საზოგადოების აღშფოთება და პროტესტი, რასაც შეუერთდა ქვეყანაში მოქმედი ოპოზიციური პარტიების თითქმის მთელი სპექტრი.

საქართველოს პრეზიდენტმა, სახალხო დამცველმა, არასამთავრობო ორგანიზაციებმა, საპარლამენტო და არასაპარლამენტო ოპოზიციურმა პარტიებმა გამოხატეს თანადგომა „ომეგა ჯგუფისადმი“, მედიისადმი და ბიზნესის დასაცავად. ამ საყოველთაო განწყობის ფონზე, სამწუხაროდ, ვერსად ვერ გავიგონე „პატრიოტთა ალიანსის“ ხმა. ამის გამო გაუმართლებლად მიმაჩნია ჩემი ყოფნა ამ პოლიტიკურ გაერთიანებაში და შესაბამისად, გავდივარ პარტიიდან.

ვიმედოვნებ, რომ პარლამენტში დროის გარკვეულ მონაკვეთში მოინახება ერთი დეპუტატი, რათა ფრაქციამ „საქართველოს პატრიოტები“ ჩვეულ რეჟიმში გააგრძელოს საპარლამენტო საქმიანობა და იმ ერთმა დეპუტატმა ჩამანაცვლოს მე. მე კი სადეპუტატო მოვალეობის შესრულებას გავაგრძელებ დამოუკიდებელი დეპუტატის სტატუსით“, - განაცხადა ჩხეიძემ პარლამენტის პლენარულ სხდომაზე.