საზოგადოება

იბერია ტვ-ს თანამშრომელთა საპროტესტო აქცია დასრულდა

ტელეკომპანია „იბერიას“ თანამშრომლების საპროტესტო მსვლელობა და აქცია კანცელარიასთან დასრულდა.

აქციის მონაწილეებმა არხის გარშემო განვითარებული მოვლენები მთავრობის ადმინისტრაციასთან გააპროტესტეს.

ტელეკომპანიაში აცხადებენ, რომ ტელევიზიაზე ხელისუფლების მხრიდან ზეწოლა ხდება. კერძოდ, თავდასხმა მიმდინარეობს „ომეგა ჯგუფზე“, რომელიც ტელეკომპანია „იბერიას“ დამფინანსებელია.

აქციის მონაწილეების თქმით, უნდა დასრულდეს ეპოქა, როდესაც სიტყვის თავისუფლებისა და კრიტიკის გამო, ტელევიზიებს ხურავენ და ართმევენ.

აქციის მონაწილეები გავრცელებულ აუდიოჩანაწერთან დაკავშირებით სისხლის სამართლის საქმის აღძვრას მოითხოვენ. მათივე შეფასებით, ჩნდება ეჭვები, რომ პროცესში არა მხოლოდ ცალკეული პირები არიან ჩართული, არამედ სახელისუფლო სივრცეც.

საპროტესტო აქციის გამო ტელეკომპანია „იბერიას“ დღეს სამი საათის განმავლობაში მაუწყებლობა შეწყვეტილი ჰქონდა.

ცნობისთვის, გუშინ „იბერიამ“ სატელეფონო ჩანაწერი გაავრცელა, რომელშიც სავარაუდოდ სპორტის ყოფილი მინისტრი ლევან ყიფიანი ტელეკომპანია „იბერიისა“ და „ომეგა ჯგუფის“ დამფუძნებელ ზაზა ოქუაშვილს ესაუბრება.

გასულ კვირას ტელეკომპანია საგანგებო განცხადება გაავრცელა. როგორც განცხადებაშია აღნიშნული, „იბერიას“ გადაუკეტეს დაფინანსების მთავარი წყარო. კერძოდ, კომპანია „ომეგა ჯგუფი“, რომლის შემადგენლობაშიც შედის ტელეკომპანია „იბერია“, პარალიზებულია.

თავის მხრივ, ფინანსთა სამინისტროში აცხადებენ, რომ „ომეგა ჯგუფში“ შემავალი სიგარეტის მწარმოებელი კომპანია შპს „ოჯთ“ არის ერთადერთი კომპანია, რომელსაც ბიუჯეტის წინაშე 50 მილიონ ლარზე მეტი ვალი ერიცხება და ამ დავალიანების ძირითად ნაწილს შეადგენს თამბაქოს ნაწარმზე აქციზის გადასახადის გადაუხდელობა.