სამართალი

იბერია ტვ-ს საქმეზე გამართულ სასამართლო სხდომაზე დაცვის მხარის ნივთიერი მტკიცებულებები გამოიკვლიეს

თბილისის საქალაქო სასამართლოში ტელეკომპანია ,,იბერიის" სამაუწყებლო ლიცენზიის იძულებით დათმობის საქმეზე პროცესი დაცვის მხარის მტკიცებულებათა გამოკვლევით განახლდა.

პროცესზე ნივთიერი მტკიცებულებები გამოიკვლიეს, კერძოდ კი, დაცვის მხარემ წარმოადგინა 4 ვიდეომასალა, რომელშიც 2004 წელს ომეგა ჯგუფსა და ტელეკომპანია იბერიაში შეჭრის პერიოდია ასახული, ასევე ნაჩვენები იქნა ამავე საკითხს მიძღვნილი 2016 წლის პერიოდის მასალები, რომლებიც მაუწყებლობის აღდგენის შემდეგ იბერია ტვ-ის ეთერში გავიდა. ვიდეომტკიცებულებებში ,,ომეგა ჯგუფის" დამფუძნებელი ზაზა ოქუაშვილი მის კომპანიებში შეჭრის პერიოდს იხსენებს, მომხდარში ყოფილ ხელისუფლებას ამხელს და სამართლიანობის აღდგენის მნიშვნელობაზე საუბრობს.

საქალაქო სასამართლოში გუშინ გამართულ პროცესზევე უნდა მომხდარიყო მოწმეთა დაკითხვა, რომლებსაც სასამართლო უწყებები ჰქონდათ გაგზავნილი, თუმცა არცერთი მათგანი სხდომათა დარბაზში არ გამოჩენილა.

როგორც მოსამართლემ განმარტა, ქიბარ ხალვაშის შემთხვევაში ორჯერ გაიგზავნა მის თბილისის საცხოვრებელ მისამართზე უწყება, თუმცა ორჯერვე მისამართზე მყოფმა მუშამ თქვა, რომ ქიბარ ხალვაში უცხოეთში იმყოფება.

რაც შეეხება კობა კვანტალიანს, მოსამართლის ინფორმაციით, კვანტალიანისგან თავად მიიღო სასამართლომ განცხადება, რომელშიც განმარტებული იყო, რომ მკურნალობის მიზნით ის 23-დან 26 სექტემბრის ჩათვლით თურქეთში იმყოფებოდა და ჩვენების მიცემას მხოლოდ ამ პერიოდის შემდეგ შეძლებდა.

აღნიშნული განცხადების გათვალისწინებით, მოსამართლემ დაცვის მხარის შუამდგომლობის საფუძველზე გადაწყვიტა, რომ კობა კვანტალიანს ხელახლა მოწმედ დაბარების უწყება შემდგომი სხდომისთვისაც გაეგზავნოს, რათა მისი დაკითხვა მომდევნო სხდომაზე მოხერხდეს.

რაც შეეხება ქიბარ ხალვაშს, როგორც ბრალდებულ ზურაბ ადეიშვილის ადვოკატმა, შოთა კახიძემ განაცხადა, მისი მოწმეთა სიიდან მოხსნის შესახებ სასამართლოს მომდევნო სხდომაზე აცნობებს.

საქმეზე მომდევნო სხდომა 3 ოქტომბრის 10:00 საათისთვის ჩაინიშნა.

ცნობისთვის, საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტმა 2004 წელს სახელმწიფო ხელისუფლების თანამდებობის პირების მიერ ტელეკომპანია „იბერიის“ დახურვის და სამაუწყებლო ლიცენზიის იძულებით ჩამორთმევის ფაქტი 2016 წლის თებერვალში გახსნა.საქმეზე ბრალდებულები არიან ყოფილი გენერალური პროკურორი ზურაბ ადეიშვილი და მისი იმჟამინდელი მოადგილე, გიორგი ლაცაბიძე.