პოლიტიკა

იან კელი საერთაშორისო სამართლის ნორმებით გათვალისწინებულ რუსეთის პასუხისმგებლობებზე საუბრობს

საერთაშორისო სამართლის ნორმებით, რუსეთი არის ოკუპანტი ძალა, შესაბამისად, მას აქვს პასუხისმგებლობა, – ამის შესახებ ჟურნალისტებს საქართველოში აშშ–ს ელჩმა, იან კელიმ განუცხადა.

იან კელიმ კომენტარი გააკეთა ჟენევის რაუნდის მომავალ მოლაპარაკებებზე, რომელიც 27-28 მარტს გაიმართება და ამასთან დაკავშრებით გრიგორი კარასინის მიერ გაკეთებულ განცხადებებზე.

„თქვენ იცით, რომ ჩვენ არ ვაღიარებთ რუსეთის მიერ აფხაზეთისა და „სამხრეთ ოსეთის“ ტერიტორიების დამოუკიდებელ ქვეყნებად გამოცხადებას. საერთაშორისო სამართლის ნორმებით, რუსეთი არის ოკუპანტი ძალა, შესაბამისად, რუსეთს აქვს პასუხისმგებლობა და წილი. მას ე.წ. სამხრეთ ოსეთის ტერიტორიაზე სამხედრო შეიარაღება აქვს. ჩვენ ველოდებით, რომ რუსეთი შეასრულებს პოზიტიურ როლს, რათა მოხდეს არსებული დაძაბულობის განტვირთვა, არ გაგრძელდეს კონფლიქტი და აღარ მოხდეს საზღვრების გადმოწევა. ასე რომ, რუსეთს აქვს გარკვეული როლი ამ ყველაფერში“, – განაცხადა იან კელიმ.

შეგახსენებთ, რომ რუსეთის საგარეო საქმეთა მინისტრის მოადგილის, გრიგორი კარასინის განცხადებით, ის იმედოვნებს, რომ ჟენევის დისკუსიების მორიგ შეხვედრაზე ძალის გამოუყენებლობის შესახებ შეთანხმება მიიღწევა. კარასინისვე ინფორმაციით, შესაძლებელია ჟენევაში მართლაც გაფორმდეს დეკლარაცია, სადაც ძალის გამოუყენებლობის ვალდებულებას ცალმხრივად არა რუსეთი , არამედ ჟენევის დისკუსიის ყველა მონაწილე აიღებს. ზეპირი დეკლარაცია ნეიტრალური ხასიათის იქნება, ანუ მასში აფხაზეთისა და სამხრეთ ოსეთის სტატუსი ნახსენები არ იქნება.

ცირა გურგენიძე