პოლიტიკა

გვაქვს დღეს ძალიან ბევრი საკითხი, რომელზეც მთავრობის წარმომადგენლები არიან მოწვეულნი - ირაკლი კობახიძე

პარლამენტის ბიუროს სხდომაზე დღევანდელი პლენარული სხდომის დღის წესრიგზე იმსჯელეს.

დეპუტატები დღეს საქართველოს კანონის პროექტს „შვილად აყვანისა და მინდობით აღზრდის შესახებ“ და მის თანმდევ კანონპროექტებს პირველი მოსმენით განიხილავენ. ასევე, დღევანდელი პლენარული სხდომის დღის წესრიგშია საქართველოს პარლამენტის დადგენილების პროექტები: „ბავშვის განვითარებისაკენ მიმართული ადრეული ჩარევის სახელმწიფო კონცეფციის“ დამტკიცების შესახებ“, საპარლამენტო უმცირესობის მიერ ინცირებული დადგენილების პროექტი „პოლიტიკური დებატების დღის დანიშვნის შესახებ“ და „საქართველოს ტერიტორიული მთლიანობისთვის მებრძოლი სამხედრო მოსამსახურეების შესახებ საიდუმლო ინფორმაციის გადაცემის და მათი რუსეთის ფედერაციაში ექსტრადირების დანაშაულებრივი ხელშეწყობის შემსწავლელი დროებითი საგამოძიებო კომისიის შექმნის მიზანშეწონილობის თაობაზე“.

ბიუროს სხდომაზე განიხილეს საორგანიზაციო საკითხებიც.

ფრაქცია „მოძრაობა თავისუფლებისთვის-ევროპული საქართველოს“ თავმჯდომარე, გიორგი წერეთელი პოლიტიკური დებატების გამართვის სავარაუდო თარიღით დაინტერესდა. პარლამენტის თავმჯდომარის, ირაკლი კობახიძის განმარტებით, დღევანდელი პლენარული სხდომის დღის წესრიგი საკმაოდ დატვირთულია.

„გვაქვს დღეს ძალიან ბევრი საკითხი, რომელზეც მთავრობის წარმომადგენლები არიან მოწვეულნი. გარდა ამისა, ჩვენ გვაქვს ვალდებულება, საკონსტიტუციო სასამართლოს გადაწყვეტილებიდან გამომდინარე, რომ რაც შეიძლება, მალე დავიწყოთ განხილვა ფარული საგამოძიებო მოქმედებების შესახებ კანონპროექტების პაკეტის და შესაბამისად, ესეც ჩაჯდება აუცილებლად დღის წესრიგში. ამაზეა დამოკიდებული საბოლოო ჯამში ჩვენ რამდენად მოვასწრებთ დებატების გამართვას ამ საკითხთან დაკავშირებით“,- განაცხადა ირაკლი კობახიძემ.

ნინო ექვთიმიშვილი