პოლიტიკა

გუშინ თუ ვინმე ახორციელებდა ძალადობას, ეს იყო შსს, ჩვენ თავს არავის არ დავსხმივართ - დავით კირკიტაძე შსს-ის მიერ დაწყებულ გამოძიებაზე

გაერთიანებული ოპოზიციის წევრის, დავით კირკიტაძის მტკიცებით, ველისციხესთან გამართულ აქციაზე ოპოზიციის წევრები სამართალდამცველებს თავს არ დასხმიან.

მისივე ინფორმაციით, მის სახლთან პოლიცია დილიდან გამოჩნდა.

„დილით 08:00 საათზე კარზე აბრახუნებდნენ. ამ დროს მეზობლის ზარი შემოვიდა და თქვა, რომ პოლიციელები იყვნენ და თავიდან ვერ ამოიცნო. დავურეკე მეგობრებს, ჟურნალისტებს. მალევე დატოვეს ჩემი სახლის მიმდებარე ტერიტორია. ეს მხდალი ხელისუფლების ნაბიჯი იყო. ახლა მივიღებთ გადაწყვეტილებას და ვიმოქმედებთ კანონის შესაბამისად, თუმცა ხელისუფლებას გავცემთ პასუხს.

გუშინ თუ ვინმე ახორციელებდა ძალადობას, ეს იყო შსს. ჩვენ თავს არავის არ დავსხმივართ და მათ პირველსავე მითითებაზე გავეშურეთ სხვა გზისკენ. გახარიასა და მის გამოძიებას არ ვენდობი“, – განაცხადა კირკიტაძემ.

დავით კირკიტაძე გუშინ გურჯაანში, ველისციხესთან „ნაციონალური მოძრაობის“ წევრებსა და სამართალდამცველებს შორის დაპირისპირებაში მონაწილეობდა.

შსს-მ სამართალდამცველებზე თავდასხმის ფაქტზე გამოძიება საქართველოს სსკ-ის 353-ე მუხლის 1-ლი ნაწილით დაიწყო, რაც პოლიციის მიმართ მისი საქმიანობის შეწყვეტის მიზნით წინააღმდეგობასა და ძალადობას გულისხმობს.