პოლიტიკა

გუშინ თავად იძალადეს აქტივისტებზე და ახლა დევნა დაიწყეს პოლიტიკურ ოპონენტებზე - ლევან ხაბეიშვილი

„ერთიანი ნაციონალური მოძრაობის“ წევრის ლევან ხაბეიშვილის განცხადებით, დავით კირკიტაძის სახლთან დღეს სამართალდამცველებს სპეცოპერაციის მცდელობის იმიტაცია ჰქონდათ.

მისივე თქმით, დღეს დავით კირკიტაძის სახლთან ათეულობით პოლიციელი იყო მობილიზებული.

„თავად მოიპარეს არჩევნები და გაგვილახეს აქტივისტები. ქალბატონი ია კერზაიას მკვლელობაში გახარიაა ეჭვმიტანილი. გუშინ თავად იძალადეს აქტივისტებზე და ახლა დევნა დაიწყეს პოლიტიკურ ოპონენტებზე. სპეცოპერაციის ჩატარების მცდელობის იმიტაცია ჰქონდათ აქ. უცნაურ ქვეყანაში ვცხოვრობთ, როცა კრიმინალები ებრძვიან მშვიდობიან მანიფესტანტებს. ათეულობით პოლიციელი იყო აქ. საკუთარი თვალით ვნახე მას შემდეგ, რაც აქ მოვედით დათოს მეგობრები. არ გამოვრიცხავ, დაკავების ოქმიც არ ჰქონდათ, რადგან ძალიან მალე გაქრნენ. თუ საბუთი ეჭირათ, ალბათ განახორციელებდნენ. სადარბაზოში ათეულობით პოლიციელი იყო. ვეცდებით, ეს კადრები მოვიპოვოთ“, – განაცხადა ხაბეიშვილმა.

გაერთიანებული ოპოზიციის წევრმა, დავით კირკიტაძის ინფრომაციით, მის სახლთან პოლიცია იყო მობილიზებული.

კირკიტაძე გუშინ გურჯაანში, ველისციხესთან „ნაციონალური მოძრაობის“ წევრებსა და სამართალდამცველებს შორის დაპირისპირებაში მონაწილეობდა.

შსს-მ ველისციხეში აქციაზე სამართალდამცველზე თავდასხმის ფაქტზე გამოძიება დაიწყო.