კომენტარი

გუშაგმა ნორმების სრული დაცვით უპასუხა - ლევან იზორია

საქართველოს თავდაცვის მინისტრი ლევან იზორია გამოეხმაურა კრწანისის სასწავლო ცენტრში მომხდარ იმ ინციდენტს, რა დროსაც 23 წლის გიგა შენგელია დაიღუპა.

ლევან იზორია ამბობს, რომ სასწავლო ცენტრში დაახლოებით 03:30 წუთზე სამი უცხო პირი შეიჭრა, რასაც გუშაგის ქმედება მოჰყვა.

მინისტრის შეფასებით, გუშაგზე თავდასხმა იღებდა საშიშ და აგრესიულ ხასიათს, რასაც ამ უკანასკნელმა ნორმების სრული დაცვით უპასუხა.

„დილის 03:30 საათზე სამი პირი ცდილობდა უკანონოდ შეჭრილიყო, რასაც მოჰყვა კანონიერი რეაგირება გუშაგისგან. კერძოდ, მან ჯერ სიტყვიერად გააფრთხილა, შემდეგ როდესაც უკვე თავდასხმის ფაქტს ჰქონდა ადგილი, ჰაერშიც გამაფრთხილებელი გასროლა განახორციელა, მაგრამ თავდასხმა კვლავ გრძელდებოდა და იღებდა საშიშ და აგრესიულ ხასიათს, რასაც მან ნორმების სრული დაცვით უპასუხა’’, - განაცხადა ლევან იზორიამ.

რაც შეეხება შემთხვევის შედეგად გარდაცვლილ, 23 წლის გიორგი შენგელიას ოჯახის მტკიცებას, რომ მას იარაღი არ ექნებოდა, თავდაცვის მინისტრის განმარტებით, შემთხვევის ადგილიდან დაახლოებით 100 მეტრში ნაპოვნი იქნა იარაღი.

მისივე თქმით, გამოძიება გრძელდება და მიმდინარეობს იმ ორი თანმხლები პირის დადგენა.

,,შემთხვევის ადგილზე ნაპოვნი იქნა, ამ ცენტრიდან დაახლოებით 100 მეტრში მობილური ტელეფონი, პისტოლეტიც," - აღნიშნა ლევან იზორიამ.

ნინო ექვთიმიშვილი