სამართალი

გურამ რჩეულიშვილი ითხოვს, რომ სასამართლო პროცესები 10 დღეში ერთხელ გაიმართოს

სამშენებლო კომპანია ცენტრ პოინტის, „ბათუმის მაგნოლიის“ ეპიზოდში ბრალდებულმა გურამ რჩეულიშვილმა, სასამართლოს შუამდგომლობით მიმართა.

დღევანდელ პროცესზე, ბრალდებულმა მოითხოვა, რომ პროცესები 10 დღეში ერთხელ გაიმართოს, სანაცვლოდ კი, დაცვის მხარე მზადაა მოწმეთა დაკითხვა სექტემბრის ბოლოსთვის დაასრულოს.

“ჩვენი მისამართით მუდმივად არის ბრალდება, რომ დაცვის მხარე ცდილობს პროცესები ხელოვნურად გააჭიანუროს. მე გამოვდივარ შუამდგომლობით და ვაცხადებ, რომ მზად ვარ სექტემბრის ბოლოსთვის დასრულდეს დაცვის მხარის მოწმეთა დაკითხვა. სანაცვლოდ ვითხოვ, რომ საქმეზე პროცესები ჩატარდეს ათ დღეში ერთხელ, რათა უკეთ შევძლო მოწმეთა მობილიზება, პროცესებზე მოყვანა და სხვა საქმეების წარმოება”, - განაცხადა რჩეულიშვილმა.

გარდა ამისა, რჩეულიშვილის თქმით, დაცვის მხარეს 500 მოწმე ყავს, თუმცა მზად არის ეს ციფრი გაანახევროს.

„300 მოწმემდე ჩამოვედით. შეგვეძლო თითო მოწმე თითო სხდომაზე დაგვეკითხა და პროცესი უსასრულოდ გაგრძელებულიყო, მაგრამ ეს არც ჩვენს ინტერესშია“, - განაცხადა რჩეულიშვილმა.

პროკურორებმა დაცვის შუამდგომლობის განხილვისთვის დრო ითხოვეს. ბრალდების გადაწყვეტილება მომდევნო სხდომაზე გახდება ცნობილი.

დღევანდელ პროცესზე კი, „ბათუმის მაგნოლიის“ ეპიზოდზე დაცვის მხარის მოწმეების დაკითხვა მიმდინარეობს.

მონიკა დავლიანიძე