პოლიტიკა

გუნდის განწყობაა, რომ მიწები უცხოელებზე არ გაიყიდება - ზვიად კვაჭანტირაძე

საპარლამენტო უმრავლესობის წევრის, ზვიად კვაჭანტირაძის განცხადებით, მიწების უცხოელებზე შესაძლო გასხვისების დაკანონებაზე აგორებული აჟიოტაჟი უსაფუძვლოა. - ამის შესახებ მან ტელეკომპანია „იმედს“ უთხრა „ქართული ოცნების“ ცენტრალურ ოფისში გამართული შეხვედრის შემდეგ.

„მიწის საკითხთან დაკავშირებით მინდა აბსოლუტურად დარწმუნებით ვთქვა, რომ აჟიოტაჟი უსაფუძვლოდაა შექმნილი. მთელი გუნდის განწყობაა, რომ უცხოელებზე სასოფლო-სამეურნეო დანიშნულების მიწები არ გაიყიდება“, - თქვა კვაჭანტირაძემ.

„ქართული ოცნების“ ცენტრალურ ოფისში საპარლამენტო უმრავლესობის წევრების შეხვედრა გაიმართა.

დეპუტატებმა ორგანიზაციულ საკითხებზე, მიწის უცხოელებზე გასხვისებაზე, საკონსტიტუციო ცვლილებებსა და საარჩევნო სისტემაზე ისაუბრეს. შეხვედრა მედიისთვის დახურული იყო.

ანა მებურიშვილი