პოლიტიკა

გუგული მაღრაძის თქმით, არა მხოლოდ დეპუტატებს, არამედ ჟურნალისტებს სჭირდებათ ეთიკური სტანდარტები

საპარლამენტო უმრავლესობის წევრის, გუგული მაღრაძის შეფასებით, არა მხოლოდ დეპუტატებს, არამედ ჟურნალისტებსა და საზოგადოების გარკვეულ ნაწილს სჭირდებათ ეთიკის სტანდარტები.

დღევანდელ პრესკონფერენციაზე ჟურნალისტის ეთიკაზე საუბრისას დეპუტატმა განაცხადა, რომ დროდადრო მის შესახებ ცრუ ინფორმაცია ვრცელდება.

„აშშ-ში ვიმყოფებოდი რამდენიმე დღით ვიზიტით. ჩამოსულს დამხვდა ინფორმაცია, რომ თითქოს წარმოვადგინე საკანონდებლო ინიციატივა საზოგადოებრივ ტრანსპორტში ქცევის შესახებ. არაერთხელ დაუბრალებია მედიასაშუალებებს არაერთი ჭორი და გამონათქვამი, მაგრამ ჩვენ გვაქვს თმენის ვალდებულება და ყოველთვის, როცა მსგავსი რამ აგორდა ჩემ წინააღმდეგ, შემოვიფარგლები ხოლმე საპასუხო განცხადებებით. მაგრამ, როგორც ჩანს, ამ ტიპის ჟურნალისტების საქციელი არ დასრულებულა და გრძელდება ჩემი და ჩემი კოლეგების მიმართ უპასუხისმგებლო და უხამსი საქციელი“, – განაცხადა მაღრაძემ.

დეპუტატმა მოითხოვა, რომ არასწორი და გადაუმოწმებელი ინფორმაციის გამავრცელებელმა მედიასაშუალებებმა ბოდიში მოუხადონ საზოგადოებას შეცდომაში შეყვანისთვის და აღიარონ ეთიკის კოდექსის დარღვევა.

დეპუტატმა პარლამენტში ეთიკის კოდექსთან დაკავშირებითაც ისაუბრა და განაცხადა, რომ ის წინააღმდეგობები, რაც ეთიკის კოდექსთან დაკავშირებით არის პარლამენტში, უსაფუძვლოა.

„ასეთი რეგულაციები არსებობს ევროპის ქვეყნების ბევრს პარლამენტში. დეპუტატებს აქვთ თმენის ვალდებულება. გარკვეული სანქციები უნდა არსებობდეს, მაგრამ კიდევ კარგად უნდა გადავხედოთ, რომ სანქციები შესრულებადი იყოს, – შეურაცხმყოფელი გამონათქვამები, დისციპლინის დარღვევა, საკუთარი მდგომარეობის ვინმეს სასარგებლოდ გამოყენება, ლობისტების მუშაობა, უნდა იყოს დარეგულირებული“, - თქვა დეპუტატმა.

მისივე თქმით, ეთიკის საბჭოს შემადგენლობაში უნდა მოიაზრებოდეს პრინციპული და წესიერი ადამიანები, რომლებსაც პიროვნულად ენდობა პარლამენტის უმრავლესობა და მის მიერ ნათქვამ სიტყვას იქნება ნდობის მაღალი ხარისხი.