სამართალი

გივი თარგამაძის მანქანის აფეთქების საქმის მთავარი ფოგურანტი გათავისუფლებულია-გიორგი კანდელაკი

„ევროპული საქართველოს“ წევრის გიორგი კანდელაკის განცხადებით, გივი თარგამაძის ავტომობილის აფეთქების საქმის მთავარი ფიგურანტი, ბორის ჩაგუნავა, გათავისუფლებულია მისი თქმით, პროკურატურამ ჩაგუნავას საქმე სწრაფად დაასრულა და 9 თებერვალს მას „პირობითი სასჯელი მიესაჯა და იგი გათავისუფლებულია“.

“ჩვენთვის შოკისმომგვრელი ინფორმაცია აღმოჩნდა, იმის შესახებ რომ გივი თარგამაძის ავტომობილის აფეთქებაში მთავარი ფიგურანტი ბორის ჩაგუნავა გათავისუფლებულია. გაირკვა, რომ მთავარმა პროკურატურამ ამ ადამიანს უსწრაფესად დაუმთავრა საქმე და 9 თებერვალს მას პირობითი სასჯელი მიესაჯა და იგი გათავისუფლებულია პატიმრობიდან. ეს ხდება მაშინ, როდესაც მას დაუდასტურდა დიდი რაოდენობით ასაფეთქებელი ნივთიერების და ასაფეთქებელი მოწყობილობების, მათ შორის ტროტილის და ჰექსოგენის შეძენა- შენახვა საკუთარ ავტოფარეხში. ეს ხდება მაშინ, როცა თავად აფეთქების საქმე სასამართლოში არც კი გადაცემულა მაშინ, როდესაც მთავარი პროკურატურა გვპირდებოდა, რომ სასამართლო მთავარი ეჭვმიტანილის დარჩო ხეჩუაშვილის წინააღმდეგ იანვრის დასაწყისში დაიწყებოდა. ამ დროს საქმის მთავარი ფიგურანტი, რომელიც ადებს ხელს ბატონ ხუბაშვილს, რომლის ავტოფარეხში აღმოჩნდა ძალიან დიდი რაოდენობით ასაფეთქებელი ნივთიერება გათავისუფლებულია. ეს არის უბრალოდ შოკისმომგვრელი ინფორმაცია და რბილად რომ ვთქვათ აჩენს კითხვებს პროკურატურის და ზოგადად მთავრობის მოტივაციასთან დაკავშირებით გივი თარგამაძის აფექტების საქმეში. თქვენ ასევე იცით, რომ გივი თარგამაძემ პირდაპირ გამოთქვა ეჭვი მაღალი თანამდებობის პირებზე სახელმწიფო უშიშროების სამსახურში და ეს პირებიც არ ყოფილან დაკითხული, რაც კიდევ უფრო აძლიერებს არსებულ კითხვებს“,-განაცხადა კანდელაკმა.

მონიკა დავლიანიძე