პოლიტიკა

„გირჩი“ აპირებს მასობრივ დანაშაულში ჩაითრიოს არასრულწლოვანები - დიმიტრი ლორთქიფანიძე

„ნინო ბურჯანაძე-დემოკრატიული მოძრაობის“ წევრი, დიმიტრი ლორთქიფანიძე შსს სამინისტროს მიმართავს, რომ დროულად აღკვეთონ „გირჩის“ ქმედება, რომელიც „მარიხუანას მასობრივ თესვასა და კულტივირებას გულისხმობს“.

როგორც ლორთქიფანიძემ პრესკონფერენციაზე აღნიშნა, უკვე ისტერიული გახდა კამპანია მარიხუანის დეკრიმინალიზაციის კი არა, არამედ ლეგალიზიციის შესახებ, რაც სერიოზულ საფრთხეს წარმოადგენს.

„გირჩი“ 31 დეკემბერს აპირებს მასიურ დანაშაულში ჩაითრიოს ახალგაზრდები. ეს პოლიტიკური გაერთიანება ახდენს შინაგან საქმეთა სამინისტროს პროვოცირებას. ისინი ექსპანსიურ ქმედებაზე გადავიდნენ და აანონსებენ მარიხუანის მასობრივ თესვასა და კულტივირებას. ეს ყველაფერი არის დანაშაულის შემცველი, ამიტომ მივმართავ სამართალდამცავებს, დროულად აღკვეთონ „გირჩის“ ქმედება, რადგან ისინი მავნე ზეგავლენას ახდენენ ახალგაზრდებზე და მათ საფრთხეს უქმნიან. ისტორიას ჩაბარდა ფაშიზმი, კომუნიზმი და მალე ისტორიას ჩაბარდება ნეოლიბერალიზმი, მაგრამ ვიდრე ისინი არსებობას შეწყვეტენ, არის საშიშროება, რომ დაღუპონ ახალგაზრდები“,-განაცხადა დიმიტრი ლორთქიფანიძემ.

მონიკა დავლიანიძე