საზოგადოება

გიორგი შალუტაშვილი მთავარი პარაზიტი და ბოროტმოქმედია - თეატრალური უნივერსიტეტის სტუდენტური მოძრაობა

საზოგადოებრივ მაუწყებელთან შეკრებილმა თეატრისა და კინოს სახელმწიფო უნივერსიტეტის სტუდენტებმა საგანგებო განცხადება გააკეთეს. ახალგაზრდები უმაღლესი საგანმანათლებლო დაწესებულების რექტორსა და ადმინისტრაციას რეპრესიებსა და პროტესტის ხმის ჩახშობის მცდელობაში ადანაშაულებენ.

სტუდენტები ამბობენ, რომ გიორგი შალუტაშვილი "მთავარი პარაზიტი და ბოროტმოქმედია", რომელიც ძალაუფლებას დახამდა და უნივერსიტეტში "ქართული ოცნების" პოლიტიკის გატარებას ცდილობს.

„იმ სტუდენტებს, რომლებიც ვიბრძვით და ვაპროტესტებთ, თავზე აყენებენ პოლიციას და შემდეგ რიცხავენ. 28 თებერვალს დაჩქარებული წესითა და ბევრი დარღვევით თეატრალურმა კომისიამ მიიღო სტუდენტთა ეთიკის ახალი კოდექსი. ამ კოდექსის მიზანი თავისუფალი სიტყვის ჩახშობაა. ჩვენ თვალწინ აყალბებენ სიმართლეს, ჩვენი სახელით ადგენენ მორალურ წესებს, რომელიც სრულიად ამორალური და დისკრიმინაციულია.

სტუდენტებს თითს გვიქნევენ და გვეუბნებიან, რომ უნივერსიტეტის სახელით ნუ ვლაპარაკობთ. გვეუბნებიან, იმ სტუდენტებს, რომლებიც ხმას სოლიდარობაზე და თანადგომაზე იღებენ. ეს ხმა იბრძვის უსამართლობის, ძალადობის, რეპრესიებისა და ტერორის წინააღმდეგ. გვეუბნებიან, რომ შევინარჩუნოთ სიმშვიდე და ვაკონტროლოთ ტონი მაშინ, როცა მომწამლავი ხსნარის სუნში ვიგუდებით და გვხუთავენ.

დაცვას ხელით გავყავართ და გვეუბნება, რომ მოგვეჩვენა. ჩემს უფლებას რომ არღვევენ, თურმე მომეჩვენა და ეს ჩემი ბრალია. ჩემი ბრალია თუ ვიცავ, ჩემი, ჩემი მეგობრების, თანამებრძოლების, უკანონოდო დაკავებულების, მოქალაქეების უფლებებისა და ღირსებას, ჩვენი ქვეყნის ღირსება. თურმე, ჩვენ ვართ პარაზიტები, რომელიც საუნივერსიტეტო სივრცეს უნდა მოშორდნენ. სინამდვილეში მთავარი პარაზიტი და ბოროტება, ძალაუფლებასა და სკამს დახამებული რექტორი და ადმინისტრაციის წევრები არიან. უნივერსიტეტი მათი პირადი საკუთრება არ არის და არ დავუთმობთ, არც უნივერსიტეტს და არც ამ ქვეყანას", - განაცხადეს სტუდენტებმა.

შეგასენებთ, რომ თეატრალური უნივერსიტეტის სტუდენტური მოძრაობის ცნობით, პროტესტში მონაწილე სტუდენტების ნაწილს უნივერსიტეტმა სტუდენტის სტატუსი შეუჩერა.

ისინი სოციალურ ქსელში მეილს აქვეყნებენ, სადაც ნათქვამია, რომ კომისიამ "ეთიკის კოდექსით გათვალისწინებული ნორმების დარღვევის საკითხი" განიხილა და სტუდენტის სტატუსის შეწყვეტა გადაწყვიტა.