სამართალი

გიორგი სანაიას ოჯახი პროკურატურას მიმართავს

ჟურნალისტ, გიორგი სანაიას ოჯახი პროკურატურას მიმართავს და მოუწოდებს, პატიმარ კოტე ციხისთავის განცხადების საფუძველზე გამოძიება დაიწყოს.

გიორგი სანაიას საფლავთან ოჯახის წევრები და ახლობლები შეიკრიბნენ. 2011 წელს მოკლულ ჟურნალისტს დღეს 43 წელი შეუსრულდებოდა.

ოჯახის წევრები აცხადებენ, რომ ისინი თავიდანვე ამბობდნენ, ეს იყო შეკვეთილი მკვლელობა.

გიორგი სანაიას ძმა, ჟურნალისტი ვახო სანაია მოითხოვს, რომ დაიკითხოს ყველა ის პირი, მათ შორის შევარდნაძის მთავრობიდან, რომელიც კოტე ციხისთავის განცხადებაში ფიგურირებდა.

მისი თქმით, სატელევიზიო სიუჟეტის გასვლის შემდეგ საგამოძიებო ორგანოდან ოჯახს არავინ დაკავშირებია.

როგორც ვახო სანაია ამბობს, ოჯახი დარწმუნებულია, რომ ეს იყო პოლიტიკური მკვლელობა და მას ჰყავდა შემკვეთები, ორგანიზატორები, დამხმარეები და შემსრულებლები.

“რუსთავი 2”-ის ეთერით ციხიდან მოვისმინეთ კოტე ციხისთავის განცხადება. ის საუბრობს დეტალებზე და ავითარებს პანკისურ ვერსიას, მათ შორის, “კასეტასთან” დაკავშირებით. ის პირდაპირ აცხადებს, რომ იცის ვინ იყვნენ ამ მკვლელობის ორგანიზატორები და მან დაასახელა ყოფილი მაღალჩინოსნები. ამბობს, რომ მკვლელობის შემსრულებელი იყო შოთა ჭიჭიაშვილი.

ოჯახი ვითხოვთ, რომ მოხდეს პროკურატურის მხრიდან ამაზე რეაგირება. რამდენიმე დღეში, ოფიციალურად, წერილობითაც მივმართავთ პროკურატურას, რომ დაიწყოს გამოძიება, დაიკითხოს კოტე ციხისთავი. ჩვენ არ ვიცით, რა ინტერესით და რატომ დაიწყო ახლა მან ამ თემაზე საუბარი. ჩვენ არასდროს გავსულვართ სამართლებრივი სივრციდან და არც გავალთ. ეს ყველაფერი არის გამოძიების, სახელმწიფოს, პროკურატურის გასაკეთებელი. ჩვენ ამდენი წელია ვითხოვთ ამ საქმის გამოძიებას.

პროკურატურას ახლაც მივმართავთ მედიის საშუალებით და რამდენიმე დღეში განცხადებასაც შევიტანთ”, - განაცხადა ვახო სანაიამ.