სამართალი

გიორგი ლუკავას ქართული მხარისთვის გადაცემის საქმეზე აფხაზეთში ე.წ. სპეციალური საპარლამენტო კომისია შეიქმნა

აფხაზეთის დე-ფაქტო რესპუბლიკის პარლამენტში ქართული მხარისთვის გიორგი ლუკავას გადაცემის ფაქტის შემსწავლელი კომისია შეიქმნა.

რიგგარეშე სხდომას, რომელიც ეხებოდა ლუკავას შეწყალების საკითხს, ესწრებოდნენ ე.წ. შსს-ს, ე. წ. უშიშროების, ე. წ. უზენაესი სასამართლოს და ე. წ. გენერალური პროკურატურის წარმომადგენლები. ის 7 საათზე მეტხანს გაგრძელდა.

დე-ფაქტო რესპუბლიკის შინაგან საქმეთა მინისტრის, გარი არშბას ინფორმაციით, ლუკავა აფხაზეთის ე.წ. პრეზიდენტმა რაულ ხაჯიმბამ შეიწყალა.

დე-ფაქტო რესპუბლიკის გენერალური პროკურორის, ზურაბ აჩბას განმარტებით, „ნებისმიერი [დამნაშავე] შეიძლება იყოს შეწყალებული, თუკი ეს სახელმწიფოს ინტერესებში შედის“.

ე.წ. პარლამენტარის, რაულ ლოლუას თქმით, ლუკავას გადაცემა სამხრეთ ოსეთის დე-ფაქტო პრეზიდენტის მიმართვის საფუძველზე მოხდა. ამის სანაცვლოდ, ქართულმა მხარემ ცხინვალს დაკავებული ოსი სამხედროები გადასცა.

ე.წ. აფხაზი დეპუტატები პრეზიდენტის შეწყალების კანონიერებასთან დაკავშირებით დასკვნას 5 იანვარს წარადგენენ.

აფხაზეთის ე.წ. უმაღლესი სასამართლოს გადაწყვეტილებით ლუკავას 20 წლით თავისუფლების აღკვეთა ჰქონდა მისჯილი აფხაზეთის ტერიტორიაზე ჩადენილი დანაშაულებისთვის. მას ასევე დაეკისრა ჯარიმა 225 000 რუბლის ოდენობით ე.წ. რესპუბლიკის სასარგებლოდ.

ლუკავა სასჯელს დრანდის ციხეში იხდიდა. 7-წლიანი პატიმრობის შემდეგ ის ქართულ მხარეს გადასცეს, რასაც აფხაზეთში საპროტესტო აქციები მოჰყვა.

აფხაზეთის დე-ფაქტო პრეზიდენტის ადმინისტრაციამ შექმნილ ვითარებასთან დაკავშირებით საგანგებო განცხადებაც გამოაქვეყნა, სადაც განმარტა, რის საფუძველზე მოხდა ლუკავას გათავისუფლება.

ანა მებურიშვილი