პოლიტიკა

გიორგი კვირიკაშვილის გადადგომა და მთავრობის ეკონომიკური გუნდის შეცვლა ქვეყნის ეკონომიკურ მდგომარეობასთან პირდაპირ კავშირში არაა - ლევან დავითაშვილი

გარემოს დაცვისა და სოფლის მეურნეობის მინისტრმა ლევან დავითაშვილმა გამორიცხა კავშირი ქვეყანაში არსებულ ეკონომიკურ მდგომარეობასა და პრემიერი-მინისტრისა და მთავრობის ეკონომიკური გუნდის შეცვლას შორის.

„ეკონომიკურ ზრდასა და შედეგებს რაც შეეხება, ჩვენ მართლაც კარგი შედეგები გვაქვს. სავალუტო ფონდმა საკმაოდ კარგი დასკვნა გააკეთა. საკმაოდ კარგი ეკონომიკური ზრდა გვაქვს, ამ მხრივ, მაისის თვე მართლაც რეკორდულია ჩვენი მთავრობის პირობებში და გამორჩეული რეგიონში. თუმცა ეს პირდაპირ კავშირში არ არის იმასთან, რაც იყო პოლიტიკური გადაწყვეტილება. გადაწყვეტილება მიღებული იყო თვითონ პრემიერ-მინისტრ გიორგი კვირიკაშვილის მიერ. რა თქმა უნდა, ასეთი გადაწყვეტილებები გუნდში კონსულტაციების შედეგად ხდება ხოლმე. ამიტომ ამის მეტს ამაზე ვერ დავამატებ“,- უპასუხა დავითაშვილმა შეკითხვას, რატომ შეეწირა ქვეყანაში არსებულ სოციალურ-ეკონომიკურ მდგომარეობას პრემიერი კვირიკაშვილი და მთავრობის ეკონომიკური გუნდი მაშინ, როცა მიმდინარე წლის მაისში ეკონომიკურმა ზრდამ 7,5% შეადგინა.