სამართალი

გიორგი გვიჩიანის და ნიკა ჩემიას პროცესი სააპელაციო სასამართლოში 5 იანვარს გაგრძელდება

სააპელაციო სასამართლოში გიორგი გვიჩიანის და ნიკა ჩემიას პროცესი 5 იანვარს გაგრძელდება.

შესაძლოა, სწორედ 5 იანვარს გახდეს ცნობილი, როდის გამოუშვებენ ნიკა ლომინაძის მკვლელობაში მსჯავრდებულებს საპატიმროდან.

გვიჩიანისა და ჩემიას ადვოკატის, გელა ნიკოლეიშვილის განცხადებით, ახლადგამოვლენილი გარემოებები რადიკალურად ცვლის საქმეში მსჯავრდებულების მონაწილეობას.

,,ამ მოწმეების ჩვენებები ცვლის ყველაფერს, თავდაყირა აყენებენ იმ მტკიცებულებებს, რომელთა საფუძველზეც იქნა გამამტყუნებელი განაჩენი გამოტანილი. ზოგიერთი მოწმე თვითონ ამბობს, თუ რა გარემობებში მისცა და რატომ ის ცრუ ჩვენებები, რომლის გამოც შემდეგ შეღავათები მიიღეს მათ. აქედან გამომდინარე, იქმნება სრული სურათი, თუ როგორ, რატომ, როდის და რა ვითარებაში და ვის მიერ იქნა შეკერილი ეს საქმე’’, - განაცხადა გელა ნიკოლეიშვილმა.

თავის მხრივ, პროკურატურის წარმომადგენლის, გვამცა გვიმრაძის მტკიცებით, ახლადგამოვლენილი გარემოებებით გვიჩიანსა და ჩემიას ნიკა ლომინაძის მკვლელობასთან შემხებლობა არ ჰქონიათ.

,,ახალი გამოძიების ფარგლებში დგინდება, რომ ამ ხალხს, დღეს ვინც მსჯავრდებულის სტატუსით სარგებლობს, საერთოდ არანაირი შემხებლობა ნიკოლოზ ლომინაძის მკვლლეობის საქმესთან არ ჰქონიათ. შესაბამისად, არანაირ ინფორმაციას არ ფლობენ იმაზე, თუ ვინ მოკლა ნიკოლოზ ლომინაძე. ჩვენი მხრიდან ტარდება არაერთი საგამოძიებო და საპროცესო მოქმედება, რომელიც გამიზნულია იქითკენ, რომ დადგინდეს ნიკა ლომინაძის მკვლელობა რეალურად ვინ ჩაიდინა’’, - განაცხადა პროკურორმა გვანცა გვიმრაძემ.

შეგახსენებთ, რომ „თელასის" მენეჯერი ნიკა ლომინაძე ბახტრიონის ქუჩაზე მოკლული 2002 წელს იპოვეს. გია გვიჩიანი და ნიკა ჩემია ამ მკვლელობის შეკვეთის ბრალდებით 2006 წელს დააკავეს და უვადო პატიმრობა მიუსაჯეს.

გასულწელს კი, პროკურატურამ განაცხადა, რომ ახლადგამოვლენილი გარემოებებით მსჯავრდებულების ლომინაძის მკვლელობასთან შემხებლობა არ დასტურდება.

ნინო ექვთიმიშვილი