სამართალი

გიორგი გახარიას ინფორმაციით, ახალქალაქში მომხდარ ინციდენტთან დაკავშირებით ბრალი ორივე მხარეს წარედგინება

შს მინისტრის გიორგი გახარიას ინფორმაციით, ახალქალაქში მომხდარ ინციდენტთან დაკავშირებით ბრალი ორივე მხარეს წარედგინება.

როგორც მინისტრმა ჟურნალისტებს განუცხადა, გამოძიების პროცესში იყო გარკვეული პრობლემები, როცა გამოძიებასთან დაზარალებული მხარე არ თანამშრომლობდა და ჩვენებებს არ იძლეოდა.

„ამ საქმეს იძიებს შინაგან საქმეთა სამინისტრო. გამოძიება მიმდინარეობს. იყო გარკვეული პრობლემები, რაც ძალზედ არასასიამოვნო იყო - დაზარალებული მხარე არ თანამშრომლობდა, უბრალოდ ჩვენებებს არ იძლეოდა და ეს იყო დროში გაჭიმული პროცესი. თუმცა, როგორც ვიცი, დღეს ეს პროცესი დასრულდება, სტანდარტი შეიქმნება და ბრალი წარედგინება ორივე მხარეს, თუ არ ვცდები“, - განაცხადა გიორგი გახარიამ.

ჟურნალისტის კითხვაზე, ადგილი ჰქონდა თუ არა პროვოკაციას, შინაგან საქმეთა მინისტრმა უპასუხა, რომ ამას არავითარი მნიშვნელობა არ აქვს.

„პროვოკაცია არ ნიშნავს იმას, რომ ფიზიკური ზემოქმედება უნდა მოახდინო ადამიანზე, თუმცა არც პროვოკაცია არის სასურველი და სახარბიელო. მე კიდევ ერთხელ ვიმეორებ, ბრალი სტანდარტით, როგორც ვიცი, დღეს დღის განმავლობაში იქნება წარდგენილი,“ - განაცხადა გიორგი გახარიამ.

ცნობისთვის, პოლიტიკური გაერთიანება “ძალა ერთობაშიას“ ინფორმაციით, ახალქალაქში მათი ოთხი აქტივისტი სცემეს. მათივე განცხადებით, საარჩევნო შტაბს თავს დაესხა ჯგუფი, დეპუტატ ენზელ მკოიანის ძმის ხელმძღვანელობით.

შს სამინისტროს ინფორმაციით, გამოძიება საქართველოს სისხლის სამართლის კოდექსის 239-ე მუხლის მე-2 და მე-3 ნაწილებით მიმდინარეობს, რაც წინასწარი შეთანხმებით ჯგუფის მიერ ჩადენილ ხულიგნობას გულისხმობს.