პოლიტიკა

გიორგი გაბიტაშვილი ადამიანის უფლებათა დაცვისა და სამოქალაქო ინტეგრაციის კომიტეტის წინაშე ადამიანის უფლებათა დაცვის საკითხებზე მოხსენებით წარსდგა

საქართველოს მთავარი პროკურორის მოადგილემ გიორგი გაბიტაშვილმა საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტს „2016 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ“ სახალხო დამცველის ანგარიშში საქართველოს პროკურატურის მიმართ გაცემული რეკომენდაციების შესრულების შესახებ ინფორმაცია მიაწოდა.

როგორც შეხვედრაზე გიორგი გაბიტაშვილმა აღნიშნა, ადამიანის უფლებათა დაცვა საქართველოს პროკურატურის მთავარ პრიორიტეტს წარმოადგენს და ამ მიმართულებით უწყება მჭიდროდ თანამშრომლობს სახალხო დამცველის აპარატთან.

გასულ წელს საქართველოს პროკურატურას სახალხო დამცველის ანგარიშის საფუძველზე შესასრულებლად განესაზღვრა 13 რეკომენდაცია. აღნიშნული რეკომენდაციები ეხებოდა წამების, არაადამიანური და ღირსების შემლახავი მოპყრობის ფაქტების გამოძიებას, დაზარალებულის საპროცესო უფლებებს, გამოხატვის თავისუფლებას, სიძულვილით მოტივირებული დანაშაულის, მათ შორის რელიგიური შეუწყნარებლობის ნიშნით ჩადენილი დანაშაულის წინააღმდეგ ბრძოლას, ქალთა მიმართ და ოჯახური ნიშნით ჩადენილ დანაშაულებს და საკუთრების უფლებას.

მთავარი პროკურორის მოადგილის განცხადებით, საქართველოს პროკურატურის მიერ ყველა რეკომენდაცია შესრულდა და ამ მიმართულებით მუშაობა მომავალშიც აქტიურად გაგრძელდება.

საქართველოს პროკურატურა ყოველწლიურად წარადგენს ინფორმაციას სახალხო დამცველის მიერ ანგარიშში მოცემული რეკომენდაციების შესრულების შესახებ. უწყება ამ მიმართულებით სახალხო დამცველის აპარატთან და საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტთან თანამშრომლობას მომავალშიც აქტიურად გააგრძელებს.