პოლიტიკა

გია ვოლსკი კითხვაზე, რატომ არ ჩანს ივანიშვილი : ხშირად ჩანს ტელევიზიით მიხეილ სააკაშვილი, მაგრამ აქამდე არც ჭკვიანური უთქვამს რამე და არც სასარგებლო საქართველოსთვის

„ყველა მოქმედება, რომელიც ოპოზიციას აქამდე ახასიათებდა და ალბათ, მომავალშიც სხვას არ უნდა ველოდოთ, მიმართულია დესტაბილიზაციისა და დესტრუქციისკენ“, - ასე გამოეხმაურა პარლამენტის ვიცე-სპიკერი გია ვოლსკი ინფორმაციას იმის შესახებ, რომ 16 დეკემბერს შესაძლოა, ოპოზიციამ პრეზიდენტის ინაუგურაციის პარალელურად, თელავში აქცია გამართოს.

„მე არ ვფიქრობ, რომ მათი ქცევა შეესაბამება თანამედროვე, საერთაშორისო, დემოკრატიულ პრინციპებსა და იმ ტრადიციას, რომელიც ევროპულ ქვეყანას უნდა ახასიათებდეს“, - აღნიშნა ვოლსკიმ.

რაც შეეხება ოპოზიციას მოთხოვნას ვადამდელი საპარლამენტო არჩევნების ჩატარებასთან დაკავშირებით, ვოლსკიმ განაცხადა, რომ ოპოზიცია ცდილობს, ხმაური გამოიწვიოს ამ საკითხზე.

„ერთადერთი მიზანი ოპოზიციის ის არის, რომ ხმაური გამოიწვიოს იმ საკითხებთან დაკავშირებით, რაზეც ჩვენ საკმაოდ ვრცელი და ინტენსიური მსჯელობა გვქონდა, მათ შორის საზოგადოებაში, საკონსტიტუციო ცვლილებების განხილვისას“, - განაცხადა დეპუტატმა.

კითხვაზე, რატომ არ ჩანს საპრეზიდენტო არჩევნების შემდეგ „ქართული ოცნების“ თავმჯდომარე ბიძინა ივანიშვილი, ვოლსკიმ უპასუხა, რომ „გამოჩენა-არგამოჩენასთან დაკავშირებით მე ვიტყოდი, რომ ხშირად ჩანს ტელევიზიით მიხეილ სააკაშვილი, მაგრამ აქამდე არც ჭკვიანური უთქვამს რამე და არც სასარგებლო საქართველოსთვის“.