პოლიტიკა

გია ვოლსკი არ მალავს სიმპათიას “ლოზუნგის“ მიმართ

პარლამენტარმა, გია ვოლსკიმ ტვ პირველის „დღის ამბებში“ განაცხადა, რომ სიმპათიითა განწყობილი პარტია “ევროპული საქართველოს“ ლოზუნგის მიმართ.

მიუხედავად ამისა, ვოლსკი აღნიშნავს, რომ მის ქვეშ გაერთიანებული პირები სააკაშვილთან ერთად სჩადიოდნენ დანაშაულს:

"ჩემი სიმპათია ლოზუნგის მიმართ ნამდვილად არის, მაგრამ ხალხი, საზოგადოება, რომელიც ამ ლოზუნგის ქვეშ გაერთიანდა, საქართველოში სააკაშვილთან ერთად ჩადიოდა გარკვეულ დანაშაულებებს. ასე რომ, მათ პასუხები უნდა გასცენ უამრავ კითხვას,“- განაცხადა ვოლსკიმ პირდაპირ ეთერში.

მისი თქმით, როგორც ყოფილი, ასევე მოქმედი “ნაციონალური მოძრაობის“ წევრები შეეცდებიან, რაც შეიძლება მაგრად გალანძღონ “ქართული ოცნება“ და “დიდი დემაგოგიის კორიანთელი დააყენონ“.

სავარაუდო თანამშრომლობაზე პოლიტიკოსმა განაცხადა, რომ დააკვირდება მოვლენების განვითარებას:
“თანამშრომლობას რაც შეეხება, მომავალში ვნახოთ. ერთსაც და მეორე მხარესაც ჯერ პასუხი აქვთ გასაცემი საკმაოდ მძიმე შეკითხვებზე,“-განაცხადა ვოლსკიმ.

ჟურნალისტის შეკითხვაზე, მონაწილეობდა თუ არა “ქართულ ოცნება“ “ნაციონალური მოძრაობის“ დაშლაში, ვოლსკიმ უპასუხა, რომ ამასა და გიგი უგულავას ციხიდან გამოსვლაში ბიძინა ივანიშვილის ან „ქართული ოცნების“ რომელიმე წევრის ხელი არ ურევია.

ანა მებურიშვილი