პოლიტიკა

გია გაჩეჩილაძე საპარლამენტო უმრავლესობის დაშლას გამორციხავს

ფრაქცია ,, ქართული ოცნება – მწვანეების’’ თავმჯდომარე გია გაჩეჩილაძე საპარლამენტო უმრავლესობის დაშლას გამორიცხავს. მისი თქმით, თუ ასეთი „სასწაული მოხდა“, ის იქნება ბოლო, ვინც უმრავლესობას დატოვებს.

ასე გამოეხმაურა ის „ქართული ოცნებაში“ გუშინ გამართულ შეხვედრას და აღნიშნა, რომ პარლამენტის თავმჯდომარის მიერ გაკეთებული განცხადება ახალგაზრდა კაცის ემოციური განცხადება იყო, რომელმაც პირად შეურაცხყოფად მიიღო ის, რაც გედევან ფოფხაძემ განაცხადა.

,,ცუდია, როდესაც ასეთი ამბები უმრავლესობაში ხდება, მაგრამ ვფიქრობ, ყველაფერი დალაგდება. ყველამ უნდა გაიზიაროს პასუხისმგებლობა. როცა უმრავლესობაში ხარ, სახელმწიფო პასუხისმგებლობა შენზე გადმოდის და ამიტომ პიროვნული ყოველთვის უკანა პლანზე უნდა გადასწიო.

ფრაქცია „მწვანეების” პოზიცია ყოველთვის მიმართული იქნება უმრავლესობის შენარჩუნებისკენ, რადგან ამას სახელმწიფოებრივი მნიშვნელობა აქვს”,-განაცხადა მან.

გუშინ „ქართული ოცნების“ ოფისში შეხვედრა გაიმართა, რომელშიც პრემიერ–მინისტრი, პარლამენტის თავმჯდომარე, უმრავლესობის ლიდერი, უმრავლესობაში შემავალი ფრაქციების თავმჯდომარეები და უმრავლესობის ვიცე–სპიკერები მონაწილეობდნენ.

ცირა გურგენიძე