პოლიტიკა

გემზე, რომელსაც მეკობრეები ბენინის სანაპიროსთან თავს დაესხნენ, ქართველები არ იმყოფებოდნენ

გემზე, რომელსაც მეკობრეები ბენინის სანაპიროსთან თავს დაესხნენ, ქართველები არ იმყოფებოდნენ. ამის შესახებ პირველი არხი საზღვაო ტრანსპორტის სააგენტოს დირექტორ თამარ იოსელიანზე დაყრდნობით იუწყება.

იოსელიანის თქმით, დაახლოებით ორი დღის წინ შემოვიდა ინფორმაცია, რომ გემზე ქართველი მეზღვაურები იმყოფებოდნენ, თუმცა გადამოწმების შედეგად ეს არ დადასტურდა.

„ჩვენთან ეს ინფორმაცია შემოვიდა დაახლოებით ორი დღის წინ, რასაც მყისიერი რეაგირება მოჰყვა. გადავამოწმეთ ეს ინფორმაცია, რამდენად შეესაბამებოდა სიმართლეს. გემთმფლობელისგანაც და ასევე სხვა წყაროებიდანაც დადასტურებული ინფორმაციით, ქართველები არ იმყოფებიან არც ეკიპაჟის წევრების სიაში და შესაბამისად არც გატაცებულთა სიაში“, – განაცხადა იოსელიანმა.

მედიაში გავრცელებული ინფორმაციით, გვინეის ყურეში, ბენინის სანაპიროსთან გემს, რომლის ბორტზეც ორი ქართველი იმყოფებოდა, მეკობრეები დაესხნენ თავს და რამდენიმე ადამიანი გაიტაცეს.