პოლიტიკა

გელათის ტაძარს დღეს აღარაფერი ემუქრება, მთავარი ტაძარი გადახურულია უნიკალური კონსტრუქციით - თინათინ რუხაძე

დღეს უკვე გვაქვს რეალური ხელშესახები შედეგი, გელათის ტაძარს აღარაფერი ემუქრება, – ამის შესახებ საქართველოს კულტურის მინისტრმა, თინათინ რუხაძემ საქართველოს პირველი არხის გადაცემაში „დღის თემა“ განაცხადა.

როგორც თინათინ რუხაძემ აღნიშნა, გელათის მთავარი ტაძარი გადახურულია უნიკალური კონსტრუქციით.

„პირველ რიგში, სწორი გადაწყვეტილება იყო იმდროინდელი კულტურის სამინისტროსი, რომ გაკეთდა სარეაბილიტაციო დროებითი კომიტეტი, ძალიან კარგი იყო, ეს ფორმა რომ შეიმუშავა სახელმწიფომაც ეკლესიასთან და მეცნიერებთან ერთად. დღეს ვდგავართ უკვე იმ მიჯნაზე, რომ რეალური ხელშესახები შედეგი გვაქვს. დღეს ტაძარს აღარაფერი ემუქრება. დღეს გუმბათიც დაედგა, მთავარი ტაძარი გადახურულია უნიკალური კონსტრუქციით, რომელიც ნამდვილად არის უნიკალური.

დღეს გერმანელი მეცნიერებიც იყვნენ ადგილზე, ადგილზე იყო არქიმანდრიტი მამა კირიონიც, რომელიც არის დროებითი კომიტეტის ხელმძღვანელის მოადგილე და რომელიც უშუალოდ ხელმძღვანელობს ამ პროცესს. ბევრი ქართველი მეცნიერიც იყო და ვთქვით, რომ, მაგალითად, ნოტრდამის შემთხვევაში, როდესაც ის დროებით გადახურვაში მოექცა, მთელი მასა აწვებოდა თვითონ ტაძარს. გელათის შემთხვევაში ისეთი უნიკალური ტექნოლოგიაა შემუშავებული უცხოელი და ქართველი ექსპერტების საბჭოს წევრების მიერ, რომ გელათს აქვს ცალკე მოწყობილი ეს და არცერთი დაწოლა ტაძარზე არ მიდის. კონსტრუქცია, რომელიც ფარავს ამ წუთას მთავარ ტაძარს, დგას თავის მზიდებზე. თავისთავად, პირველი ეტაპის ერთი პრობლემა უკვე მოიხსნა“, – განაცხადა თინათინ რუხაძემ.

ამასთან, თინათინ რუხაძემ განაცხადა, რომ მოზაიკის და კედლის მხატვრობის მიმართულებით სრულიად უნიკალური კვლევებია დასრულებული.

„ეს ნიშნავს, რომ უკვე ვიცით მეთოდი, როგორ უნდა იმუშაონ და ვინ უნდა იმუშაოს. იყო დიდი წყვეტა, ჩვენ ახალგაზრდა დემოკრატიის ქვეყანა ვართ და ბევრი სხვა პრობლემაც გვქონდა. ომები გადავიტანეთ ამ 30 წელიწადში და, შესაბამისად, ყველაფერს ადამიანებს ვერ დავაბრალებთ, რომ ამ დარგის სპეციალისტები ვეღარ გადამზადდნენ, ვეღარ დაეწიენ ამ 30 წლის განმავლობაში, იყო ლოგიკური წყვეტები. მე არავის ხელს არ ვაფარებ და არაფერს არ ვამართლებ, უბრალოდ, მე მესმის, რომ უნიკალური სპეციალისტები ჰყავს საქართველოს სახელოვნებო ბევრ სფეროში, მაგრამ არის რიგი პრობლემებისა, რომლებიც, შეიძლება, სახელოვნებო განათლებიდან მოდის, მოკლედ, შეიძლება, მოდის წყვეტიდან. მოხდა ისე, რომ უნიკალური მეცნიერები, ვინც გვყავდნენ, ძალიან ცოტა დარჩა და რიგ შემთხვევაში ხელი აღარ გყოფნის, უბრალო ადამიანს, ჩვენს მაყურებელს რომ გავაგებინოთ.

ჩვენ ძალიან დიდი კულტურული მემკვიდრეობა გვაქვს და გაგვიჭირდა ამის აწევა. ახლა უკვე არის მოდელი. რატომ ვამბობ, რომ სწორად გაკეთდა. მინდა, ადამიანებმა გაიგონ, შემდეგ შეგვეშინდა, ამ 30 წლის განმავლობაში რაღაც ძეგლები დაზიანდა, ზოგი ობიექტურად, ზოგი სუბიექტურად, ზოგი, შეიძლება, ძალითაც, ვანდალიზმის ფაქტებიც არსებობს ძეგლებზე, მაგრამ ფაქტი ერთია, რომ არაფრით არ შეიძლება, ნორმალურ ხელოვანს და მეცნიერს უნდოდეს, თავისი ქვეყნის კულტურული მემკვიდრეობა ძალით დააზიანოს. ახლა ჩვენ გელათის კომიტეტით ვქმნით უნიკალურ მოდელს, როგორ უნდა ვეფეროთ, მოვუაროთ.

გეტყვით მთავარ მიდგომას, რაც იუნესკო-მ აღნიშნა და სადაც შეგვაქეს ამ ბოლო აქტში, რომელიც ატვირთულია უკვე მათ ვებგვერდზე და ივლისში წავა განხილვაში – ჯერ ერთი, იცით, რომ რეაქტიული კომისია ჩამოდის და უკვე აღარ ვართ ამ ნუსხაში, სადაც შეიძლება, რამე მოგვადგეს – ბოლო ამ აქტში იწერებიან მადლობას, რომ საქართველოს მთავრობის, ეკლესიის და მეცნიერთა ერთად დგომით, ნამდვილად მსოფლიო მემკვიდრეობის მიდგომები შეგვაქვს ამაში. ჩარევას ძეგლზე, სჯობს, ვიდრე არ გამოიკვლევ, არ ჩაერიო და ჩვენ ჩვენი სიჩქარით, შეიძლება, რაღაცა დროს ადგილზე არასწორად მიღებული გადაწყვეტილებით… არასწორია ახლა ჩემგან წარსულზე საუბარი. გელათი ხომ არ იყო პირველი. იმედია, გვახსოვს, გასული 20 წლის განმავლობაში რაებია გაკეთებული. აქედან გამომდინარე, მოდით, ასე ვთქვათ, მე რვა თვეა, მინისტრი ვარ, მე პროგრესზე ვარ ორიენტირებული“, – განაცხადა თინათინ რუხაძემ.

წყარო