სამართალი

გელა ხვედელიძის მეუღლე შურისძიების მიზნით თავდასხმის მოტივს გამორიცხავს

შს მინისტრის ყოფილი მოადგილის, გელა ხვედელიძის ოჯახი შურისძიების მიზნით თავდასხმის მოტივს გამორიცხავს.

როგორც ჟურნალისტებს გელა ხვედელიძის მეუღლემ, მარეხ ფერაძემ განუცხადა, მომხდარ თავდასხმასთან დაკავშირებით ოჯახს ჯერჯერობით ვერსიები არ აქვს, თუმცა შურისძიებას გამორიცხავენ.

ფერაძე, რომელიც თავდასხმის დროს მეუღლესთან ერთად იმყოფებოდა, გამოძიებას ჩვენება უკვე მისცა.

ხვედელიძის მეუღლის განცხადებით, შემთხვევა მაშინ მოხდა, როდესაც ისინი სახლიდან გამოდიოდნენ და მათ ორი ნიღბიანი მამაკაცი თავს დაესხა.

ფერაძის თქმით, მან სცადა ერთ-ერთი თავდამსხმელისთვის ნიღაბი ჩამოეხსნა, თუმცა ვერ მოახერხა.

დაზარალებულის მეუღლის განცხადებით, თავდამსხმელები, სავარაუდოდ, 25-30 წლის ასაკის პირები იყვნენ.

,,მეუღლე საუბრობდა ტელეფონზე და უცებ დაესხა ეს ორი ნიღბიანი თავს. ვერ გეტყვით, არავითარი მუქარა არ ყოფილა, მე არ ვიცი. გაოგნებული ვარ.

ვცდილობდი, რომ ნიღაბი ჩამომეხსნა ერთ-ერთი ბიჭისთვის, მაგრამ ვერ მოვახერხე, გაიქცნენ’’, - აცხადებს დაშავებულის მეუღლე.

მისივე ინფორმაციით, თავდამსხმელებს არ გამოუყენებით იარაღი და ხვედელიძეს წიხლებს ურტყამდნენ.

შს მინისტრის ყოფილი მოადგილე, გელა ხვედელიძე თავის არეში და სახეში მიყენებული მრავლობითი დაზიანებებით „ნიუ ჰოსპიტალის“ კლინიკაში იმყოფება.

გელა ხვედელიძეზე თავდასხმის ფაქტზე გამოძიება „საქართველოს სისხლის სამართლის კოდექსის“ 117-ე მუხლით მიმდინარეობს, რაც სხეულის განზრახ მძიმე დაზიანებას გულისხმობს.

ნინო ექვთიმიშვილი