სამართალი

გელა ხვედელიძის ადვოკატები თავდასხმის ამსახველ ვიდეომასალას ავრცელებენ

შს მინისტრის ყოფილი მოადგილის, გელა ხვედელიძის ადვოკატების განცხადებით, მათ ხვედელიძეზე სავარაუდო თავდამსხმელების იდენტიფიცირება მოახდინეს.

პრესკონფერენციაზე ადვოკატებმა შესაბამისი ვიდეომასალა გაასაჯაროვეს.

ადვოკატების მტკიცებით, ვიდეომასალაში ასახული კადრები, თავდასხმის დღეს, სათვალთავლო კამერამ დააფიქსირა.

„ ჩვენ მოვითხოვეთ სათვალთვალო კამერების ჩანაწერების ამოღება. დააკმაყოფილეს ეს შუამდგომლობა, თუმცა დღემდე ვცდილობთ მოვიპოვოთ ბარნოვის ქუჩის მიმდებარედ არსებული კამერების მასალა, სადაც ჩანს, როგორ აყენებენ გელა ხვედელიძეს ფიზიკურ შეურაცხყოფას. მიუხედავად ამისა, ჩვენ მოვიპოვეთ, მასალა, სადაც ჩანს ავტომანქანა, შეგნებულად არ ვამბობთ ნომრებს და ველოდებით პროკურატურის ინფორმაციას. საგამოძიებო ორგანო გვეუბნება, რომ 10 კამერა ამოღებულია და ჯერ დათვალიერება მიდის.

ჩვენი აზრით, პროცესი ჭიანურდება, მიმდინარეობს გარკვეული მასალების წაშლა. მოვუწოდებთ, რომ დაგვათვალიერებინონ ეს მასალა. ჩვენს მოპოვებულ მასალაში ნათლად ჩანს, თუ როგორ გადაადგილდება ორი პიროვნება, რომლებმაც ფიზიკური შეურაცხყოფა მიაყენეს გელას“, - განაცახადა გელა ხვედელიძის ადვოკატმა, ნათია კორკოტაძემ.

შეგახსენებთ, რომ შინაგან საქმეთა მინისტრის ყოფილ მოადგილეს გელა ხვედელიძეს თავს მიმდინარე წლის 3 აპრილს დაესხნენ. მას, ყბა-სახის მოტეხილობა აღენიშნებოდა.

მონიკა დავლიანიძე