პოლიტიკა

გედევან ფოფხაძის განცხადებით, ქართულ მხარეს მაია ოთინაშვილის გათავისუფლებისთვის საერთაშორისო მხარდაჭერის გარდა სხვა რესურსი არ აქვს

პარლამენტის ტერიტორიული მთლიანობის აღდგენის საკითხთა დროებითი კომისიის თავმჯდომარის, გედევან ფოფხაძის განცხადებით, ქართულ მხარეს მაია ოთინაშვილის გასათავისუფლებლად საერთაშორისო მხარდაჭერის გარდა, სხვა რესურსი არ გააჩნია.

„ოკუპირებულ ტერიტორიებზე ადამიანის უფლებების სისტემური დარღვევა ხდება. შექმნილ ვითარებაში ერთადერთი რესურსი საერთაშორისო ორგანიზაციის ინფორმირება და საერთაშორისო რეზოლუციებში ამ ყველაფრის ასახვაა. ამასთანავე, ხაზი იმას უნდა გაესვას, რომ რუსეთი ოკუპირებულ ტერიტორიებზე ადამიანის უფლებებს არღვევს და ადამიანის უფლებების ტოტალური დარღვევა ხდება. არ შეიძლება, 21-ე საუკუნეში ეს დაუსრულებლად გაგრძელდეს, ერთი კონკრეტული სახელმწიფო ანკლავებს ქმნიდეს და ანკლავებზე ადამიანის უფლებებს ტოტალურად არღვევდეს. ამ თვალსაზრისით საერთაშორისო ზეწოლა უნდა იყოს და ეს შედეგს გამოიღებს“, – განაცხადა დეპუტატმა.

საოკუპაციო ძალებმა გორის რაიონის სოფელ ხურვალეთიდან 37 წლის მაია ოთინაშვილი გაიტაცეს. ბოლო ინფორმაციით, მას 10-დღიანი ე.წ. წინასწარი პატიმრობა აქვს შეფარდებული.