პოლიტიკა

გავათავისუფლოთ წარმოება დღგ-ის გადასახადისგან და ამით შევუქმნათ მათ თანაბარი პირობები ფარმაცევტულ ბაზარზე - მამუკა ბახტაძე

საქართველოს პრემიერ-მინისტრობის კანდიდატმა მამუკა ბახტაძემ პარლამენტის რიგგარეშე სხდომაზე სიტყვით გამოსვლისას განაცხადა, რომ მისთვის ერთ-ერთ პრიორიეტულ საკითხს ფარმაცევტულ ბაზარზე თამაშის თანაბარი პირობების დამკვიდრება წარმოადგენს.

„ფარმაციის იმპორტიორები იხდიან უფრო ნაკლებ გადასახადს, ვიდრე ადგილობრივი მწარმოებლები. რა თქმა უნდა, ეს არის სრულიად მიუღებელი, მით უმეტეს, რომელიც შეეხება ისეთ სენსიტიურ სექტორს, როგორიცაა ფარმაცია და წამლები“, - აღნიშნა პრემიერ-მინისტრობის კანდიდატმა.

მან ყურადღება გაამახვილა უახლესი კვლევების შედეგებზე, რომლის თანახმად, საქართველოს მოსახლეობის ხარჯების ძალიან დიდი ნაწილი წამლების შესყიდვაზე მიდის.

„აქედან გამომდინარე, ჩვენი შემოთავაზება იქნება, რომ გავათავისუფლოთ წარმოება დღგ-ის გადასახადისგან და ამით შევუქმნათ მათ თანაბარი პირობები, რომ გასწიონ კონკურენცია და მოიზიდონ დამატებითი ინვესტიციები, შექმნან ახალი სამუშაო ადგილები და რაც მთავარია, კონკურენციაში შევიდნენ იმპორტირებულ საქონელთან“, – განაცხადა ბახტაძემ.