კომენტარი

გაურკვეველი ორი ადამიანის ჩანაწერი არაფერს ნიშნავს და არ მეტყველებს იმაზე, რომ ვინმე მაღალი თანამდებობის პირს დანაშაული აქვს ჩადენილი - კახა კალაძე

ჩემთვის გაურკვეველი ორი ადამიანის ჩანაწერი არაფერს ნიშნავს და არ მეტყველებს იმაზე, რომ ვინმე მაღალი თანამდებობის პირს ხელისუფლებაში დანაშაული აქვს ჩადენილი, - ასე პასუხობს თბილისის მერი კახა კალაძე "ომეგა ჯგუფზე" ზეწოლის ფაქტებთან დაკავშირებით გავრცელებული ფარული ჩანაწერების შესახებ შეკითხვას.

მისივე თქმით, თუ რაიმე კითხვა არსებობს იმ ადამიანებთან დაკავშირებით, ვინც ჩანაწერებში ფიგურირებს, გამოძიებაც უნდა ჩატარდეს და პასუხი უნდა მოეთხოვოს თითოეულ მათგანს.

კახა კალაძე ,,ომეგა ჯგუფთან“ დაკავშირებით რომან კაკულიას იმ განცხადებასაც გამოეხმაურა, რომელშიც მისი თანაგუნდელი ამბობს, რომ არ ისურვებდა იმ გუნდის წევრობას, სადაც ბიზნესზე ზეწოლას ახორციელებენ.

დედაქალაქის მერის თქმით, პარტიის წევრებს განსხვავებული ღირებულები რომ ჰქონოდათ, ერთად არ იქნებოდნენ.

“ვთქვათ, დადასტურდა ამ ჩანაწერებში არსებული საუბრის ავთენტურობა, რა მერე?! ჩვენ რომ სხვა ღირებულები გვქონოდა, დღეს "ქართულ ოცნებაში" არ ვიქნებოდით და არ ვიდგებოდი იქ, სადაც ვდგევართ. შესაბამისად, ჩვენი ღირებულებები გაჟღერებულია და არაერთხელ გვისაუბრია ამაზე. ჩვენი ყველას, თითოეული ჩვენგანის ამოსავალი არის ადამიანი და ადამიანის კეთილდღეობა. არ მიყვარს ხოლმე საუბარი, მაგრამ მიწევს წარსულში დაბრუნება იმიტომ, რომ ყველაფერი არის შედარებითი.

ახლა უნდა ვისაუბროთ მომავალზე, უნდა ვისაუბროთ იმ პროქტებზე, რომელიც არის ქვეყნისთვის მნიშვნელოვანი, რომელიც წაადგება ქვეყნის ეკონომიკურ განვითარებას; ვისაუბროთ იმ პროექტებზე, რაც ქალაქში ხორცილდება. მიუხედავად იმისა, რომ გარკვეული პოლიტიკური ძალები, ტელევიზიები ცდილობენ, რომ ეს ყველაფერი ნეგატივში წარმოაჩინონ. რამდენად გამოდის ეს სხვა საკითხია, თუმცა არავის უნდა მივცეთ იმის შესაძლებლობა, რომ არასწორი ინფორმაციები მიაწოდონ მოსახლეობას. ჩემთვის გაურკვეველი ორი ადამიანის ჩანაწერი არაფერს ნიშნავს და არ მეტყველებს იმაზე, რომ ვინმეს, მაღალი თანამდებობის პირს, დანაშაული აქვს ჩადენილი ხელისუფლებაში. თუ რაიმე კითხვები არსებობს, იმ ადამიანებთან დაკავშირებით, ვინც უშუალოდ მონაწილეა ამ ჩანაწერებში, რა თქმა უნდა, ავთენტურობაც უნდა დადასტურდეს, გამოძიებაც უნდა ჩატარდეს და პასუხიც უნდა მოეთხოვოს თითოეულ მათგანს - ერთსაც და მეორესაც“, - განაცხადა კახა კალაძემ.

შეგახსენებთ, საქმე ეხება „ომეგა ჯგუფთან" შესაძლო ზეწოლასთან დაკავშირებით მედიაში გავრცელებულ აუდიოჩანაწერებს, რაზეც თბილისის პროკურატურამ გამოძიება დაიწყო.

საქმე 180-ე მუხლითაა აღძრული, რაც თაღლითობას გულისხმობს.