პოლიტიკა

გასაკეთებელს გავუკეთებ...არ ვაპატიებ არავის ჩემი პატრიარქის ღირსების შელახვას - ქორეპისკოპოსი იაკობი მეუფე პეტრეს ემუქრება

ჭყონდიდის მიტროპოლიტის, მეუფე პეტრეს მიერ ილია მეორისადმი გაჟღერებულ კრიტიკას ქორეპისკოპოსი იაკობი მუქარით გამოეხმაურა.

TV პირველთან ექსკლუზიურ ინტერვიუში, სასულიერო პირმა მეუფე პეტრე მწვავედ გააკრიტიკა და აღნიშნა, რომ ჭყონდიდის მიტროპოლიტი ეკლესიაში ავტორიტეტს არ წარმოადგენს.

„თვითონ ხომ უნდა იცოდეს, შიგნით რა ავტორიტეტია, რა. ახლა, თუ „ნაციონალურ მოძრაობაში“ ავტორიტეტია, ეს სხვა რაღაცაა, მაგრამ ჩვენთან მაგი ხო რაღაც ავტორიტეტი უნდა იყოს, ხო? აბსოლუტურად არაა ავტორიტეტი ჩვენთან“, - განაცხადა ქორეპისკოპოსმა იაკობმა.

ქორეპისკოპოსმა იაკობმა ასევე განაცხადა, რომ მეუფე პეტრეს „გასაკეთებელს გაუკეთებს“, თუმცა მას არ დაუკონკრეტებია, რას გულისხმობდა ამაში.

„მე, შეიძლება, პირადად რაღაც გავუკეთო. ახლა არ ვილაპარაკებ, მაგრამ გასაკეთებელს გავუკეთებ. არ ვაპატიებ არავის ჩემი პატრიარქის ღირსების შელახვას, ვინც არ უნდა იყოს“, - აღნიშნა სასულიერო პირმა.

მისივე თქმით, მეუფე პეტრეს განცხადება რუსეთის ნაკარნახევია.

„ვფიქრობ, რომ რუსების შემოთავაზება არის, რომ ჩვენი ეკლესია დააკნინონ, პატრიარქს დაარტყან, იმას დაარტყან. მე არც რუსეთი არ მაინტერესებს, არც კონსტანტინოპოლი, პირდაპირ გეტყვით, ქართველი ვარ და ჩემი საქართველოს ეკლესიის ინტერესი მაინტერესებს,“- განაცხადა ქორეპისკოპოსმა.

კითხვაზე, შეიძლება თუ არა, ჭყონდიდის მიტროპოლიტს სასულიერო სტატუსი ჩამოერთვას, ქორეპისკოპოსმა უპასუხა, რომ ეს მეუფე პეტრეზეა დამოკიდებული.

“როგორც იქცევა, თუ არ შეინანა… ბასილ მკალავიშვილი უფრო პატიოსანი კაცია, ვიდრე მაგი, როგორც იქცევა, პირდაპირ გეუბნებით… მე ვიქნები ის ადამიანი, რომელიც არ დაუშვებს, რომ ვიღაცებმა „გააპრავონ“ მაგი, რა… ეკლესიაში მე სიტყვა მეთქმის. თუ მოვინდომე, გავაკეთებ იმას, რაც გასაკეთებელია რა, რომ იცოდეთ“, - აღნიშნა ქორეპისკოპოსმა.

გუშინ მეუფე პეტრემ “ტვ პირველის” ეთერში პატრიარქი გააკრიტიკა და განაცხადა, რომ 27 დეკემბერს გამართულ სინოდის სხდომაზე დაიმსხვრა მითი პატრიარქის მწყემსიკეთილობის შესახებ. ჭყონდიდის მიტროპოლიტის განმარტებით, მას შემდეგ, რაც მამალაძის საქმეს სასამართლოს ყველა ინსტანცია განიხილავდა, სინოდს საქმის შემსწავლელი კომისია უნდა შეექმნა. ჭყონდიდის მიტროპოლიტის თქმით, გუშინდელ სხდომაზე დეკანოზის საკითხი სინოდის წევრებს საერთოდ არ განუხილავთ.