პოლიტიკა

განსხვავებული აზრი ნორმალურად, ადამიანურად და სათანადოდ უნდა გამოვხატოთ და არა უშვერი სიტყვებით - დავით ნარმანია

თბილისის მერი დავით ნარმანია გუშინ საკრებულოს სხდომაზე მომხდარ არეულობას გამოეხმაურა. მისი თქმით, პოლიტიკოსებმა საპირისპირო აზრი უნდა გამოხატონ მშვიდობიანი ფორმით.

„როცა გვაქვს განსახვავებული აზრი, ეს ნორმალურად, ადამიანურად და სათანადოდ უნდა გამოვხატოთ და არა უშვერი სიტყვებით, არა ხმამაღალი შეძახილებითა და ა.შ. საკრებულო არის ორგანო, ჩვენი თანამოქალაქეების მიერ არჩეული წევრები, რომლებიც საკრებულოში უმრავლესობაში არიან და უნდა აკეთებდნენ იმ საქმეს, რაც ეხება ქალაქს. პარკინგთან დაკავშირებული საკითხი ქალაქს სჭირდებოდა, სხვა ნებისმიერი დესტრუქციული ქმედება, მხოლოდ და მხოლოდ ხელისშეშლად შეიძლება ჩაითვალოს“, - განაცხადა ნარმანიამ.

ნარმანიამ აღნიშნა, რომ პუშკინის სკვერთან მიმდებარე ტერიტორიის ფუნქციური ზონის სტატუსის შეცვლის გადაწყვეტილება იქ მიწისქვეშა ავტოსადგომის ასაშენებლად ნაჩქარევად არ იყო მიღებული.

„საკითხი არავითარი განსაკუთრებული დაჩქარებული წესით მიღებული არ ყოფილა. ის ძალიან დიდი ხანი მზადდებოდა. როცა საუბარია მიწისქვეშა პარკინგის პროექტზე, რაც ქალაქს ძალიან სჭირდება, აუცილებელია, რომ ხელი შევუწყოთ ასეთ პროექტებს. ეს არ იქნება პირველი და უკანასკნელი პროექტი, რომელიც დამტკიცდება, რათა ჩვენს ქალაქში პარკირებასთან დაკავშირებული მდგომარეობა მნიშვნელოვნად გაუმჯობესდეს“, - განაცხადა ნარმანიამ.

მერმა დაამატა, რომ ეს ტერიტორია ვარგისია მრავალსართულიანი პარკინგის მშენებლობისთვის და რამე საფრთხე არ არსებობს.

შეგახსენებთ, გუშინ თბილისის საკრებულომ ბიძინა ივანიშვილთან დაკავშირებით ორი გადაწყვეტილება მიიღო. საკრებულომ პუშკინის სკვერთან, „პანორამა თბილისის“ სასტუმროს მიმდებარედ მიწისქვეშა ავტოსადგომის ასაშენებლად მიწის ნაკვეთს ფუნქციური ზონის სტატუსი შეუცვალა, ხოლო თაბორის მთაზე 4 700 მ2 ფართობის მიწას რეკრეაციული სტატუსი „თაბორი რიზორთსის“ სასარგებლოდ მოხსნა. თაბორის მთის აღნიშნულ ტერიტორიაზე ბიძინა ივანიშვილთან დაკავშირებულ კომპანიას გოლფის მოედნების მოსარწყავად საირიგაციო ნაგებობის აშენება სურს.

სხდომის დაწყების წინ დაპირისპირება მოჰყვა „ევროპული საქართველოსა“ და ენმ-ის თბილისის მერობის კანდიდატების - ელენე ხოშტარიასა და ზაალ უდუმაშვილის პროტესტს. მოხდარი არეულობის გამო სხდომა საათ-ნახევრით გადაიდო.

უშუალოდ სხდომა პროტესტის ნიშნად დატოვეს ალეკო ელისაშვილმა, მარინა დათუკიშვილმა, სევდია უგრეხელიძემ და შორენა ბუხრაშვილმა.

ანა მებურიშვილი