პოლიტიკა

განსაკუთრებით მნიშვნელოვანია, რომ საკანონმდებლო დონეზე კიდევ ერთხელ ფიქსირდება საქართველოს ნატო-ში გაწევრიანების იდეის სრული მხარდაჭერა - მამუკა ბახტაძე

საქართველოს პრემიერ-მინისტრ მამუკა ბახტაძის განცხადებით, აშშ-ის პრეზიდენტის, დონალდ ტრამპის მიერ აშშ-ის ეროვნული თავდაცვის ავტორიზაციის აქტზე ხელმოწერით, აშშ-ის მხრიდან საქართველოს მტკიცე მხარდაჭერა კიდევ ერთხელ დადასტურდა საკანონდებლო და აღმასრულებელ დონეზე.

მის თქმით, რამდენიმე დღის წინ საქართველომ კიდევ ერთი უპრეცედენტო მხარდაჭერა მიიღო სტრატეგიული პარტნიორისგან.

ბახტაძემ აღნიშნა, რომ საყურადღებოა, რომ საქართველოსთან დაკავშირებული საკითხები, როგორც ორმხრივ, ისე რეგიონალურ კონტექსტში სულ უფრო მკაფიოდ არის წარმოჩენილი აშშ-ის პოლიტიკურ დღის წესრიგში.

„აშშ-ის თავდაცვის ავტორიზაციის აქტი გამოირჩევა იმით, რომ მასში დაფიქსირებულია უმნიშვნელოვანესი ჩანაწერები საქართველოს ეროვნული ინტერესებისა და უსაფრთხოების, ასევე რეგიონალური უსაფრთხოების მხარდაჭერის თვალსაზრისითაც. განსაკუთრებით მნიშვნელოვანია, რომ საკანონმდებლო დონეზე კიდევ ერთხელ ფიქსირდება, ნატო-ს ღია კარის პოლიტიკის, მათ შორის, საქართველოს ნატო-ში გაწევრიანების იდეის სრული მხარდაჭერა“, – განაცხადა პრემიერმა.

მან აღნიშნული მხარდაჭერისთვის საქართველოს სტრატეგიულ პარტნიორს მადლობა კიდევ ერთხელ გადაუხადა.

პრემიერის შეფასებით, ეს არის კიდევ ერთი ნათელი დადასტურება იმისა, რომ საქართველოსა და აშშ-ის შორის ურთიერთობა მართლაც სტრატეგიული ხასიათისაა.

დონალდ ტრამპმა რამდენიმე დღის წინ აშშ-ის ეროვნული თავდაცვის ავტორიზაციის აქტს (FY19NDAA) მოაწერა ხელი. საქართველოს საგარეო საქმეთა სამინისტროს ინფორმაციით, ნიშანდობლივია, რომ აქტის ჩანაწერის მიხედვით, საქართველო, ევროპის უსაფრთხოების კონტექსტში, შავი ზღვისა და ბალტიის ქვეყნებთან ერთად, მოაზრებულია როგორც აშშ-ის მოკავშირე და პარტნიორი.