პოლიტიკა

განმუხურის მოსახლეობას კერძო საკუთრების მიზერულ თანხებში დათმობას აიძულებენ - ნაციონალურო მოძრაობა

ერთიანი ნაციონალური მოძრაობის ზუგდიდის ოფისში საგანგებო ბრიფინგი გაიმართა.

ზუგდიდის საკრებულოს ნაციონალური მოძრაობის წევრის, ანი წითლიძის განცხადებით, განმუხურის მოსახლეობას კერძო საკუთრების მიზერულ თანხებში დათმობას აიძულებენ, წინააღმდეგ შემთხვევაში კი ემუქრებიან, რომ მათი ოჯახის წევრებს გაუსწორდებიან.

კონკრეტულად, საკრებულოს წევრმა გუბერნატორი ლევან შონია და ტყის ძმების ხელმძღვანელი, დავით შენგელია, მოსახლეობის დაშინებაში დაადანაშაულა.

წითლიძის განცხადებით, გუბერნატორი დაჯგუფების ხელმძღვანელთან ერთად მოსახლეობას მიწების ჩამორთმევით ემუქრება. მისივე თქმით, რეგიონში არსებულ ყველა მსხვილ ბიზნესს გუბერნატორი აკონტროლებს.

როგორც ენმ-ს წევრი ამბობს, მიწების გასხვისების თაობაზე მოსახლეობა ფინანსურ პოლიციაშიც კი ჰყავდათ დაბარებული, სადაც აღნიშნული ქონების შესახებ დეტალურად გამოკითხეს.

,,ის, რაც განმუხურში ხდება დღეს, არის ჩვეულებრივი ტერორი ხელისუფლების სახელით. კონკრეტულად, გუბერნატორი შონიას სახელით და ეკონომიკის სამინისტროს სახელით ადგილობრივ მოსახლეობას კერძო საკუთრების დათმობაზე ელაპარაკებიან კრიმინალური ავტორიტეტები. ამ პროცესში ჩართული არიან ძალოვანი სტრუქტურები, ჩართულია ფინანსური პოლიცია. ასზე მეტი მოსახლე არის უკვე დაკითხული. განმუხურში დღეს ხორციელდება მტელი რიგი ფინანსური მაქინაციები’’, - განაცხადა ანი წითლიძემ.

ნინო ექვთიმიშვილი