პოლიტიკა

განკარგულება არ გამოქვეყნდება - რატომ ჩამოართვეს მოქალაქეობა სააკაშვილს

უკრაინის პრეზიდენტის ადმინისტრაციის ინფორმაციით, მიხეილ სააკაშვილს უკრაინის მოქალაქეობა იმიტომ ჩამოერთვა, რომ განაცხადის შევსებისას მან არასწორი ინფორმაცია მიაწოდა.

„სახელმწიფო საიმიგრაციო სამსახურმა წარადგინა დამაჯერებელი ფაქტები, რომ განაცხადის შევსებისას იყო მიწოდებული არასაიმედო ინფორმაცია, შესაბამისად, უკრაინის პრეზიდენტთან არსებულმა სამოქალაქო საკითხების კომისიამ დააკმაყოფილა შუამდგომლობა მიხეილ სააკაშვილისთვის უკრაინის მოქალაქეობის ჩამორთმევის შესახებ და ურჩია პრეზიდენტს, მიიღოს შესაბამისი გადაწყვეტილება“, - მისწერა უკრაინის პრეზიდენტის ადმინისტრაციამ „ინტერფაქს-უკრაინას“.

პოროშენკოს ადმინისტრაციის განცხადებით, შესაბამისი განკარგულება არ გამოქვეყნდება.

„პერსონალურ მონაცემთა დაცვის კანონმდებლობის შესაბამისად, ეს ნორმატიული აქტი არ ექვემდებარება გამოქვეყნებას, რადგან შეიცავს კონფიდენციალურ ინფორმაციას, კერძოდ, პერსონალურ მონაცემებს“, - უპასუხა უკრაინის პრეზიდენტის ადმინისტრაციამ „ინტერფაქს-უკრაინას“.

შეგახსენებთ, გუშინ გახდა ცნობილი, რომ მიხეილ სააკაშვილს უკრაინის მოქალაქეობა ჩამოართვეს.

ანა მებურიშვილი