პოლიტიკა

განახლებულ ეკონომიკის სამინისტროს დიმიტრი ქუმსიშვილი უხელმძღვანელებს

ეკონომიკისა და მდგრადი განვითარების სამინისტროს უერთდება ენერგეტიკის სამინისტრო და გარემოს დაცვისა და ბუნებრივი რესურსების სამინისტროს ბუნებრივი რესურსების მართვის კომპონენტი.

ამის შესახებ მთავრობის ადმინისტრაციაში გამართულ ბრიფინგზე პრემიერ-მინისტრმა, გიორგი კვირიკაშვილმა განაცხადა.

მისი ინფორმაციით, ეკონომიკისა და მდგრადი განვითარების მინისტრის თანამდებობაზე ინიშნება დიმიტრი ქუმსიშვილი, რომელიც ინარჩუნების პირველი ვიცე-პრემიერის სტატუსს და კოორდინაციას გაუწევს ეკონომიკური გუნდის მუშაობას.

,,თქვენ იცით, რომ ეკონომიკის სწრაფი განვითარება, რომელიც ჩვენი მთავრობის უმთავრესი პრიორიტეტია კიდევ უფრო მოქნილი ეკონომიკური პოლიტიკის გატარებას ითვალისწინებს.

ეკონომიკის სამინისტრო მულტისექტორული უწყებაა და პასუხისმგებელია არამხოლოდ ზოგადად ეკონომიკური პოლიტიკის ძირითადი მიმართულებების შემუშავებაზე, არამედ საგარეო ვაჭრობის, ტრანსპორტის, კომუნიკაციების ინოვაციურ მოწყობაზე და სხვა სექტორულ განვითარებაზე.

ენერგეტიკის, ბუნებრივი რესურსების მართვის და ეკონომიკის სხვა მიმართულებების ერთი ქოლგის ქვეშ მოქცევა ჩვენს ეკონომიკურ განვითარებას უფრო ეფექტიანს და შედეგზე ორიენტირებულს გახდის“, - განაცხადა გიორგი კვირიკაშვილმა.

რაც შეეხება ეკონომიკის მოქმედ მინისტრს, გიორგი გახარიას, ის შინაგან საქმეთა მინისტრად ინიშნება.

ნინო ექვთიმიშვილი